ग्रीन कफीको झुटो प्रचार गर्ने एक विदेशी नागरिकसहित दुई जना प्रहरीको नियन्त्रणमा

काठमाण्डौ – प्रहरी प्रधान कार्यालय केन्द्रीय अनुसन्धान ब्युरो (सीआईबी) ले ग्रीन कफीले मोटोपना घटाउँछ भनी ठगी गर्ने एक विदेशी नागरिकसहित दुई जनालाई नियन्त्रणमा लिएको छ ।

शुक्रवार ब्युरोले पत्रकार सम्मेलन गरी दुवै जनालाई सार्वजनिक गरेको हो । पत्रकार सम्मेलनमा ब्युरोका निर्देशक एवम् प्रहरी नायब महानिरीक्षक (डीआईजी) सहकुल थापाले उनीहरूले नौ सय ६० रुपैयाँको ग्रीन कफीलाई २० र ४० हजार रुपैयाँसम्ममा बिक्री गरेर ठगी गरेको बताउनुभयो ।

विना औषधि, विना व्यायाम, विना डाइटिङ, कुनै साइड इफेक्ट विना, एक हप्तामा १३ किलोसम्म तौल घट्ने अचम्मको विधि पत्ता लगाएको भन्दै भ्रमपूर्ण सूचना फैलाइ बिक्री गरेर उनीहरूले ठगी गरेको सीआईबीले जनाएको छ ।

काठमाण्डौ नयाँ बजार खुशीबु बस्ने टिम वान सप्लायर्स प्रालीका सञ्चालक ४२ वर्षीय आशिष आचार्यले ग्रीन कफी खाइ वजन घटाएको विज्ञापन बनाइ सामाजिक सञ्जालमा राखेर ठगी गरेको उजुरीका आधारमा ब्युरोको टोलीले नियन्त्रणमा लिएको हो । त्यसैगरी रसियाली नागरिक इगोरकुर्टसलाई पनि प्रहरीले नियन्त्रणमा लिएको हो ।

पक्राउ परेका अभियुक्तहरूको नेटवर्क भारत र रुसमा पनि भएको अनुसन्धानबाट खुल्न आएको प्रहरीले जनाएको छ । प्रहरीले उनीहरूको साथबाट १२ वटा जुटको बोरामा राखिएको ६ सय ४४ किलो कफी, २५ थान ल्यापटप लगायतका सामान बरामद गरेको छ । उनीहरूले कानुन बमोजिम अनुमति नलिइकन अन्य सामग्री पनि बिक्री गर्ने गरेको पाइएको छ ।

साभार उज्यालो अनलाइन
Photo seto pati.com