काठमाडाैं । कोरोना संक्रमणबाट धनुषा, वीरगन्ज, पाेखरा र पाल्पाका १-१ गरी थप ४ जनाकाे मृत्यु भएकाे छ ।
बिहीबार राति मृत्यु भएका धनुषाकाे नगराइन नगरपालिका वडा नं. ७ डेवडिहाका ६५ वर्षीय पुरुषमा मृत्युपछि कोरोना संक्रमण पुष्टि भएको हाे ।
श्वासप्रश्वासमा समस्या देखिएपछि बुधवार प्रादेशिक अस्पतालमा भर्ना भएका पुरुषलाई थप उपचारको लागि धरान लैजाने क्रममा बाटोमै मृत्यु भएको हाे ।
मृतक लामो समय देखि मुटु रोग, दम, मधुमेहका बिरामी थिए ।
यसैगरी वीरगन्जमा पनि कोरोना संक्रमणबाट १ जनाको मृत्यु भएको छ ।
वीरगन्ज महानगरपालिका–१२ मुर्लीकी ६५ वर्षीया महिलाको उपचारका क्रममा मृत्यु भएको हो । श्वासप्रश्वासमा समस्या भएपछि शुक्रबार दिउँसो २ बजे नारायणी अस्पतालमा भर्ना भएकी महिलामा कोरोना संक्रमण पुष्टि भएको थियो ।
उपचारको क्रममा उनको शुक्रबार साँझ साढे ७ बजे मृत्यु भएको अस्पतालका डाक्टर उदयनारायण सिंहले जानकारी दिए ।
यसैगरी पाेखरामा पनि १ जना कोरोना संक्रमितको मृत्यु भएको छ । मृत्यु हुनेमा पोखरा महानगरपालिका- १६ का ५२ वर्षीय पुरुष छन् ।
श्वासप्रश्वासमा समस्या आएपछि भदौ १२ गते पोखरा स्वास्थ्य विज्ञान प्रतिष्ठानको कोभिड-१९ उपचार केन्द्रमा भर्ना भएका थिए । अस्पतालमा उपचारकै क्रममा शुक्रबार राति १२ः१५ बजे मृत्यु भएको केन्द्रका निर्देशक डा. अर्जुन आचार्यले जानकारी दिए ।
यसैगरी पाल्पामा पनि १ काेराेना संक्रमितकाे मृत्यु भएकाे छ । पाल्पाकाे तानसेन नगरपालिका- ८ मदनपोखराकी ३० वर्षीया महिलाको लुम्बिनी मेडिकल कलेज पाल्पामा शुक्रबार साँझ मृत्यु भएको हो ।
ती महिला ५ भदौमा स्वास्थ्य समस्या देखिएपछि मेडिकल कलेजमा भर्ना भएकी थिइन् । कोरोनासँग मिल्दोजुल्दो लक्षण देखिएपछि स्वाब परीक्षण गर्दा ७ भदौमा उनको पीसीआर पोजिटिभ आएको थियो ।
