इन्टरनेट प्रयोगकर्ता बढेसँगै राउटरको आयातमा वृद्धि

विगतको वर्षहरूमा सीमितमात्रामा भित्रिएको राउटर पछिल्लो समय अत्यधिक आयात भएको भन्सार विभागको तथ्याङ्कमा उल्लेख छ ।

प्रयोगकर्ता र खपत बढेसँगै इन्टरनेटसम्बन्धि सामग्रीको आयात बढेको इन्टरनेट सेवा प्रदायक एशोसिएसन नेपालका अध्यक्ष सुधीर पराजुलीको भनाइ छ । विगतका दिनमा विभिन्न कार्यालयले मात्रै इन्टरनेट खपत गर्ने प्रचलन भएतापनि पछिल्लो समय घरघरमा इन्टरनेटको प्रयोगकर्ता बढेकाले अत्याधिक आयात भएको बताए ।

विभागको तथांक अनुसार आर्थिक वर्ष २०७७÷७८ मा ८३९.२७ प्रतिशतले राउटरको आयात बढेको छ । गत वर्ष दुई अर्ब १५ करोड ८२ लाख रुपैयाँ बराबरको आठ लाख पाँच हजार दुई सय ८० वटा राउटर आयात भएको छ । उक्त आयातित राउटरबाट ४० करोड रुपैयाँ राजश्व संकलन गरेको छ ।

सोही अवधिमा आर्थिक वर्ष २०७६÷७७ मा २२ कारोड ९७ लाख रुपैयाँ बराबरको १ लाख १५ हजार ३ सय ७४ वटा राउटर आयात भएको थियो । जुन आर्थिक वर्ष २०७६÷७७ को तुलनामा आव २०७७÷७८ मा ८३९.२७ प्रतिशतले बढी हो । त्यस्तै २०७६÷७७ मा आयातित राउटरबाट ४ करोड २३ लाख रुपैयाँ राजश्व संकलन गरेको थियो ।
नेपालमा सबैभन्दा बढी चीनबाट राउटर आयात भएको विभागको तथ्याङ्कले उल्लेख गरेको छ । एक वर्षको अवधिमा नेपालले चीनबाट मात्रै २ अर्ब ९ करोड ३९ लाख रुपैयाँ बराबरको ७ लाख ९६ हजार ३ सय वटा राउटर आयात गरेको ।

चीनपश्चात नेपालमा सबैभन्दा बढी राउटर आयात गर्नेमा ताइवान रहेको छ । ताइवनबाट नेपालले गत वर्ष २ करोड ७६ लाखको ६ हजार २ सय ५६ वटा राउटर आयात गरेको छ ।

त्यसैगरी, इटलीबाट २८ लाख ९२ हजारको ११ सय, लातभियबाट १ करोड ५९ लाखको ५ सय ८२, यमनबाट ५ लाख ७६ को ५ सय वटा, भारतबाट ५ लाख १३ हजारको २ सय ७६, मलेसियाबाट २२ लाख ८१ हजारको १ सय २ र अमेरिकन समाओबाट २ लाख ८६ हजारको १ सय वटा आयात गरेको विभागको तथ्याङ्कमा उल्लेख छ ।

यसैगरि अष्ट्रेलिया, जर्मनी, हङ्कङ, दक्षिण कोरिया, मेक्सिको, सिङ्गापुर, स्पेन, स्वीेडेन, थाइल्यान्ड, अमेरिका र यूएईबाट आयात भएको छ ।