सोलुखुम्बु । याक तथा चौरी व्यवसायी संघ नेपालले याक तथा चौरी प्रतिविम्ब नामक पुस्तक प्रकाशन गर्ने भएको छ । अनुसन्धानात्मक आलेख सहित विगतका कृषकहरुको अनुभवलाई दस्तावेजिकरण गर्ने उदेश्यले पुस्तक प्रकाशन गर्न लागिएको संघले जनाएको छ ।
संघले पशुविज्ञ, शोधकर्ता, जनप्रतिनिधि, संघसंस्थाका प्रतिनिधि, कृषक साथै अन्य सरोकारवालाहरुलाई लेख तथा रचना असार ३० गतेसम्म उपलब्ध गराउनका लागि आग्रह गरेको छ ।
हिमाली क्षेत्रको समृद्विको आधार, अर्थतन्त्रको मुख्य मेरुदण्डको रुपमा मानिने याक तथा चौरीपालन पेशा पछिल्लो एक दशकमा करिव ९०% ले लोप भएको विभिन्न अध्ययनले देखाएको पुष्टि भएको छ ।
याक तथा चौरी व्यवसायी संघ सोलुखुम्बुले हिमाली क्षेत्रको मुख्य पेशाको रुपमा रहेको याक तथा चौरीपालन लोप भैरहेको अवस्थामा सोलुखुम्बु जिल्ला भित्रका याक तथा चौरीपालक कृषकहरुलाई संगठित गर्दै, कृषकको क्षमता अभिबृद्वि सगै राज्यका विभिन्न निकाय सम्म याक तथा चौरीपालक कृषकको हक हित र अधिकारको लागी बहस गर्दै आईरहेको याक तथा चौरी व्यवसायी संघ सोलुखुम्बुका अध्यक्ष नुरु शेर्पाले जानकारी दिनुभयो ।
चौरीपालन पेसालाई बहुआयामिक बनाई हिमाली क्षेत्रको लोपोन्मुख पेशालाई सक्रिय बनाउनमा संघले भूमिका खेलीरहेको अध्यक्ष शेर्पाको भनाइ छ । उहाँले याक तथा चौरीपालक कृषकहरुको लागी राज्यका तीनै तहका सरकार तथा राष्ट्रिय तथा अन्तराष्ट्रिय संघसंस्थासंग सहकार्य गरि बजारीकरणका लागि पहल गर्ने बताउनुभयो । 
