सोलुखुम्बु । जिल्ला प्रहरी कार्यालय सोलुखुम्बुले बेवारिसे अवस्थामा सडकबाट उद्धार गरेको महिलालाई सुनसरी इटहरी स्थित माया घर नेपाल पठाएको छ । मङ्सिर २१ गते शुक्रवार जिल्ला प्रशासन कार्यालय, सोलुदुधकुण्ड नगरपालिका र जिल्ला प्रहरी कार्यालय सोलुखुम्बुको पहलमा माया घर नेपाल पठाइएको हो ।
आफ्नो नाम थर बताउन नसक्ने साथै स्पष्ट बोल्न नसक्ने बेवारिसे अवस्थामा गत कार्तिक ३ गते शनिवार सोलुदुधकुण्ड नगरपालिका वडा नम्बर ७ साल्मे क्षेत्र स्थित घुम्ती सडकबाट जिल्ला प्रहरी कार्यालय सोलुखुम्बुले उद्धार गरी थप उपचारको लागि जिल्ला अस्पताल फाप्लु पठाएको थियो ।
जिल्ला अस्पताल फाप्लुले नियमित रूपमा आवश्यक उपचार तथा हेरविचार गरेसँगै वहाँको नाजुक शारीरिक अवस्थामा सुधार आएको थियो ।
स्वास्थ्यमा सुधार आएसँगै वहाँलाई सुनसरी इटहरी स्थित माया घर नेपालमा पुराइसकिएको जिल्ला प्रहरी कार्यालय सोलुखुम्बुका प्रहरी नायव उपरीक्षक द्वारिका प्रसाद घिमिरेले जानकारी दिनुभयो ।
