सोलुखुम्बु । थुलुङ संस्कृति संरक्षण समाज थुलुङ दुधकोशी गाउँपालिका वडा नम्बर ६ मुक्लीले तोसि सिली प्रतियोगिताको आयोजना गरेको छ । किरातहरूको महान् पर्व उँधौलीको अवसरमा यही मङ्सिर २९ गतेको दिन ‘तोसी सिली’ प्रतियोगिताको आयोजना गरिएको आयोजकले जनाएको छ ।
थुलुङ समुदायको भाषा, संस्कृति संरक्षण सम्बर्धन गर्ने उद्देश्यले राई समुदायको जीवनशैली, सभ्यता विकासलाई झल्काउने तोसी सिलीको आयोजना गरिएको थुलुङ संस्कृति संरक्षण समाजका अध्यक्ष दिल कुमार राईले जानकारी दिनुभयो ।
उँधौली पर्व यही मङ्सिर ३० गते परेको छ । मङ्सिर १९ गते बसेको थुलुङ संस्कृति संरक्षण समाजको बैठकले उँधौली पर्वलाई सप्ताहको रूपमा मनाउने निर्णय गर्दै २९ गते उँधौलीको अवसरमा तोसी सिली प्रतियोगिताको आयोजना गरिएको अध्यक्ष राईले बताउनुभयो ।
प्रतियोगितामा प्रथम, द्धितिय, तृतीय र सान्त्वना हुने टिमलाई क्रमशः तीन हजार, दुई हजार, एक हजार पाँच सय र एक हजार रुपैयाँ नगद पुरस्कारको व्यवस्था गरिएको समाजका सचिव ललित बहादुर राईले जानकारी दिनुभयो ।
यही मङ्सिर २९ गतेको दिन थुलुङ दुधकोशी गाउँपालिका वडा नम्बर ६ मुक्ली यलाखोममा कार्यक्रम हुने आयोजकले जनाएको छ ।
