खुम्बु पासाङल्हामु गाउँपालिका । खुम्बु पासाङल्हामु गाउँपालिकाले आगामी आर्थिक वर्षका लागि ९४ करोड रुपैयाँको बजेट ल्याएको छ । गाउँपालिकाको दोस्रो गाउँ सभाको १८ औँ अधिवेशनमा ९४ करोड १० लाख १६ हजारको रुपैयाँको बजेट पेस भएको हो ।
आर्थिक वर्ष २०८१/०८२ को नीति तथा कार्यक्रम कार्यान्वयन गर्न ९४ करोड १० लाख १६ हजार रुपैयाँको बजेट ल्याएको हो । खुम्बुले पुँजीगततर्फ ६१ करोड ६९ लाख १८ हजार र चालुतर्फ ३२ करोड ४० लाख ९८ हजार रुपैयाँ विनियोजन गरेको छ ।
कुल आय ९४ करोड १० लाख १६ हजार मध्ये आन्तरिक आयतर्फ सबैभन्दा बढी ४० करोड २७ लाख ७१ हजार एक सय ८३ रुपैयाँ, सङ्घीय सरकारबाट २४ करोट ९५ लाख प्रदेश सरकारबाट दुई करोड ८२ लाख ४० हजार, सङ्घ प्रदेश र स्थानीय राजश्व बाडफाटबाट २६ करोड पाँच लाख चार हजार आठ सय १७ रुपैयाँ रकम प्राप्त हुने गाउँपालिकाका उपाध्यक्ष टासील्हामु शेर्पाले प्रस्तुत गर्नुभएको बजेटमा उल्लेख छ ।
क्षेत्रगत विकासतर्फ कुल बजेटमध्ये आर्थिक विकासतर्फ आठ करोड ९३ लाख ५० हजार, सामाजिक विकास तर्फ २५ करोड ६२ लाख ६६ हजार, पूर्वाधार विकासतर्फ ३९ करोड २५ लाख ५० हजार, सुशासन तथा अन्तर सम्बन्धित क्षेत्रतर्फ नौ करोड ७८ लाख ५० हजार र कार्यालय सञ्चालन तथा प्रशासनिकतर्फ दश करोड ५० लाख बजेट विनियोजन गरेको उल्लेख छ ।
आर्थिक वर्ष २०८०/०८१ मा गाउँपालिकाले ६२ करोड, ६० लाख, ८६ हजार रुपैयाँ र आर्थिक वर्ष २०८०/०८१ मा ७५ करोड ४५ लाख रुपैयाँको बजेट ल्याएको थियो । गत दुई आर्थिक वर्षको तुलनामा आगामी आर्थिक वर्षको लागि खुम्बुले बजेटको आकार बढाएको छ ।
खुम्बु पासाङल्हामु गाउँपालिका अध्यक्ष मिङमा छिरी शेर्पाले प्रस्तुत गर्नुभएको नीति तथा कार्यक्रममा पर्यटन, सडक र शिक्षा, विद्युत, खानेपानी साथै फोहोरमैला व्यवस्थापनलाई प्राथमिकतामा राखी बजेट विनियोजन गरिएको उल्लेख छ ।
खुम्बुले गत आर्थिक वर्ष चालु खर्चतर्फ २९ करोड ७९ लाख ७४ हजार तीन सय ५८ रुपैयाँ अर्थात् ३९.४९ प्रतिशत र पुँजीगततर्फ ४५ करोड ६५ लाख २५ हजार ६ सय ४२ रुपैयाँ अर्थात् ६०.५१ प्रतिशत रहेको थियो ।
स्थानीय सरकार सञ्चालन ऐनको दफा ७१(१) ले ‘गाउँ कार्यपालिका र नगर कार्यपालिकाले आगामी आर्थिक वर्षको राजस्व र व्ययको अनुमान (बजेट) असार महिनाको दश गतेभित्र सम्बन्धित गाउँ वा नगर सभामा सबै स्थानीय तहले असार १० गतेसम्म बजेट पेस गर्नु पर्ने कानुनी व्यवस्था रहेको छ । बजेट पेस भएको १५ दिनभित्र पारित समेत गरिसक्नुपर्ने व्यवस्था छ ।
