खुम्बु पासाङल्हामु गाउँपालिका । खुम्बु पासाङल्हामु गाउँपालिकाले तीन उत्कृष्ट कर्मचारीहरूलाई पुरस्कृत गरेको छ । असार १० गते सम्पन्न गाउँपालिकाको गाउँ सभाको १८ औँ अधिवेशनको अवसरमा कार्यसम्पादनका आधारमा उत्कृष्ट तीन जना कर्मचारीहरूलाई पुरस्कृत गरेको गाउँपालिकाले जनाएको छ ।
गाउँपालिकाको स्वास्थ्य संयोजक अर्थि माया तामाङ, प्रधानमन्त्री रोजगार कार्यक्रम अन्तर्गत कार्यरत सब-इन्जिनियर रवीन्द्रनाथ राम र एमआइएस फिल्ड सहायक हाल वडा नम्बर ४ को वडा सचिवको रुपमा कार्यरत दावा गेल्जे शेर्पालाई गाउँपालिकाको १८ औँ गाउँ सभाको अवसरमा सम्मान गरेको गाउँपालिकाका प्रशासकीय अधिकृत एवं सूचना अधिकारी सुजन कुमार बुढाथोकीले जानकारी दिनुभयो ।
कोशी प्रदेश सभा सदस्य एवं पूर्वमन्त्री बुद्धिकुमार राजभण्डारी, खुम्बु पासाङल्हामु गाउँपालिका अध्यक्ष मिङमा छिरी, गाउँपालिकाका प्रमुख प्रशासकीय अधिकृत नवराज गौतम, वडा नम्बर २ का वडा अध्यक्ष आङ फूर्वा शेर्पाको विशेष उपस्थितिमा सम्मान गरिएको जनाइएको छ ।
उहाँका अनुसार पुरस्कृत तीनै जना कर्मचारीहरूलाई ५० हजार रुपैयाँ नगद सहित सम्मान गरिएको हो ।
पुरस्कृत उत्कृष्ट कर्मचारी गाउँपालिकाको स्वास्थ्य संयोजकको रुपमा कार्यरत अर्थि माया तामाङ ७ वर्षदेखि कार्यरत हुनुहुन्छ भने सब इन्जिनियर रवीन्द्रनाथ राम र एमआइएस फिल्ड सहायक दावा गेल्जे शेर्पा ६ वर्षदेखि गाउँपालिकामा कार्यरत हुनुहुन्छ ।
उत्कृष्ट तीनै जना कर्मचारीहरूले गाउँपालिकाबाट प्रदान गरिने सेवा प्रवाहमा सहज र सरल रूपमा सहकार्य गर्दै निरन्तर नागरिकमैत्री सेवामा लागिरहने प्रतिबद्धता जनाएका छन् ।
स्वास्थ्य संयोजक अर्थी माया तामाङलाई २०७८ असार १० गते सम्पन्न सातौँ अधिवेशनको अवसरमा सर्वोत्कृष्ट कर्मचारीको रुपमा गाउँपालिकाले सम्मानीत गरेको थियो । कोभिड महामारी नियन्त्रणमा गरेको उत्कृष्ट कार्यको उच्च मूल्यांकन र योगदानको कदर गर्दै एक लाख ५० हजार नगद र प्रमाण पत्र सहित पुरस्कृत एवं सम्मान गरेको गाउँपालिकाले जनाएको छ ।
