खुम्बु : ६६२ जनाले लिए सेवा, चार लाख बढी राजश्व सङ्कलन

काठमाडौँ । खुम्बु पासाङल्हामु गाउँपालिकाले काठमाडौँबाट सञ्चालन गरेको एकीकृत सेवाबाट ६६२ जनाले सेवा लिएका छन् । गत १८ साउनदेखि २२ साउनसम्म पाँच दिन सञ्चालन गरेको एकीकृत सेवाबाट ६६२ जनाले सेवा लिएको गाउँपालिकाले जनाएको छ ।

एकीकृत सेवाको क्रममा विभिन्न शीर्षकमा गाउँपालिकाले चार लाख दुई हजार सात सय १५ रुपैयाँ ५२ पैसा राजश्व सङ्कलन गरेको खुम्बु पासाङल्हामु गाउँपालिकाका प्रमुख प्रशासकीय अधिकृत नवराज गौतमले जानकारी दिनुभयो । उहाँका अनुसार वडागत रूपमा वडा नम्बर १ बाट विभिन्न शीर्षकमा दुई लाख ३३ हजार रुपैयाँ, वडा २ बाट ३२ हजार आठ सय ६६ रुपैयाँ सङ्कलन भएको छ ।

यस्तै वडा नम्बर ३ बाट ६६ हजार सात सय १३ रुपैयाँ, वडा ४ बाट ८८ हजार ७४ रुपैयाँ र वडा ५ बाट ६४ हजार रुपैयाँ राजश्व सङ्कलन भएको छ ।

एकीकृत सेवा चार दिन सम्म सञ्चालन गर्ने पूर्व योजना थियो तर नागरिकको माग र आवश्यकता अनुसार एक दिन थप गरी साउन २२ गतेसम्म शिविर सञ्चालन गरिएको प्रमुख प्रशासकीय अधिकृत गौतमको भनाइ छ ।

काठमाडौँमा अस्थायी रूपमा बसोबास गरिरहेका नागरिकले कार्यक्षेत्रबाटै सहज र सरल ढङ्गबाट विभिन्न प्रशासनिक सेवा लिन पाएकोमा खुसी व्यक्त गर्दै आगामी दिनमा समेत यस्ता कार्यलाई निरन्तरता दिनका लागि सुझाव दिएका छन् ।

वडाले प्रदान गर्ने सम्पूर्ण प्रशासनिक सेवा काठमाडौँबाट एकीकृत सेवाको क्रममा प्रदान गर्न पाउँदा खुसी लागेको कार्यवाहक अध्यक्ष टासील्हमु शेर्पा बताउनुहुन्छ । नागरिकको माग र आवश्यकताको आधारमा आगामी दिनमा पनि सोहि प्रकारका कार्यक्रम सञ्चालन गर्ने कार्यवाहक अध्यक्ष शेर्पाको भनाइ छ ।

खुम्बुले काठमाडौँमा अस्थायी रूपमा बसोबास गर्ने र स्थायी रूपमा पालिकाभित्र ठेगाना भएका सेवाग्राहीहरूलाई हुने सुविधालाई मध्यनजर गर्दै १८ साउनदेखि २२ साउनसम्म चार दिन एकीकृत सेवा सञ्चालन गरेको थियो ।

राष्ट्रिय परिचय पत्रको विवरण सङ्कलन गर्नका साथै राष्ट्रिय परिचय पत्र वितरण, सामाजिक सुरक्षा भत्ता नवीकरण, व्यवसाय नवीकरण, पञ्जिकरण साथै वडाबाट प्रदान गरिने प्रशासनिक सेवा लगायतका सेवा प्रदान गरिएको गाउँपालिकाले जनाएको छ ।