नेचासल्यानको एकीकृत सेवा सम्पन्न, एक हजार बढिले लिए प्रत्यक्ष सेवा

काठमाडौँ । नेचासल्यान गाउँपालिकाले काठमाडौँबाट सञ्चालन गरेको एकीकृत सेवाबाट एक हजार ६ सय ६९ जनाले सेवा लिएका छन् । गत १९ साउनदेखि २२ साउनसम्म चार दिन सञ्चालन गरेको एकीकृत सेवाबाट ११६९ जनाले प्रत्यक्ष सेवा लिएको गाउँपालिकाले जनाएको छ ।

एकीकृत सेवाको क्रममा विभिन्न शीर्षकमा गाउँपालिकाले एक लाख २२ हजार तीन सय ४२ रुपैयाँ राजश्व सङ्कलन गरेको नेचासल्यान गाउँपालिका उपाध्यक्ष विना राईले जानकारी दिनुभयो ।

उहाँका अनुसार वडागत रूपमा वडा नम्बर १ बाट विभिन्न शीर्षकमा ३८ हजार ६ सय ९० रुपैयाँ, वडा २ बाट २० हजार चार सय ८५ रुपैयाँ सङ्कलन भएको छ ।

यस्तै वडा नम्बर ३ बाट १७ हजार नौ सय ९६ रुपैयाँ, वडा ४ बाट १९ हजार आठ सय ६३ रुपैयाँ र वडा ५ बाट २५ हजार तीन सय आठ रुपैयाँ राजश्व सङ्कलन भएको उपाध्यक्ष विना राईले बताउनुभयो ।

काठमाडौँमा अस्थायी रूपमा बसोबास गरिरहेका नागरिकले कार्यक्षेत्रबाटै सहज र सरल ढङ्गबाट विभिन्न प्रशासनिक सेवा लिन पाएकोमा खुसी व्यक्त गर्दै आगामी दिनमा समेत यस्ता कार्यलाई निरन्तर गर्नका लागि सुझाव दिएका छन् ।

वडाले प्रदान गर्ने सम्पूर्ण प्रशासनिक सेवा काठमाडौँबाट एकीकृत सेवाको क्रममा प्रदान गर्न पाउँदा खुसी लागेको गाउँपालिका अध्यक्ष धनजन राई बताउनुहुन्छ । नागरिकको माग र आवश्यकताको आधारमा आगामी दिनमा पनि सोहि प्रकारका कार्यक्रम सञ्चालन गर्ने अध्यक्ष राईको भनाइ छ ।

नेचासल्यानले काठमाडौँमा अस्थायी रूपमा बसोबास गर्ने र स्थायी रूपमा पालिकाभित्र ठेगाना भएका सेवाग्राहीहरूलाई हुने सुविधालाई मध्यनजर गर्दै १९ साउनदेखि २२ साउनसम्म चार दिन एकीकृत सेवा सञ्चालन गरेको थियो ।

राष्ट्रिय परिचय पत्रको विवरण सङ्कलन गर्नका साथै राष्ट्रिय परिचय पत्र वितरण, सामाजिक सुरक्षा भत्ता नवीकरण, व्यवसाय नवीकरण, पञ्जिकरण साथै वडाबाट प्रदान गरिने प्रशासनिक सेवा लगायतका सेवा प्रदान गरिएको गाउँपालिकाले जनाएको छ ।