कोभिड १९ पछि शिक्षाका चुनौतीबारे सम्मेलन सुरु

काठमाण्डौँ । कोभिड(१९ पछिको शिक्षाका चुनौती र विश्व अनुभवको आदानप्रदान गर्ने उद्देश्यले अन्तर्राष्ट्रिय सम्मेलन सुरु भएको छ ।

नेपाल खुला विश्वविद्यालय र संयुक्त राज्य अमेरिकाको मोर्गन स्टेट विश्वविद्यालयको आयोजनामा आजदेखि भर्चुअलरुपमा दुई दिने सम्मेलन सुरु भएको हो।

सम्मेलनको उद्घाटन कार्यक्रममा शिक्षा, विज्ञान तथा प्रविधिमन्त्री गिरिराजमणि पोखरेलले कोभिड(१९ का कारण उच्च शिक्षाको चुनौती थपिएकाले विश्वका सबै धनी र गरीब देशका लागि साझा चुनौती रहेको भन्दै यसको सामना गर्न साझा प्रयास गर्नुपर्नेमा जोड दिनुभयो ।

उहाँले नेपालले शैक्षिक सत्रलाई खेर जान नदिने गरी प्रबन्ध गरेको दाबी गर्दै सूचना र प्रविधिमा आएका नवीन आयाम र परिवर्तनलाई आत्मसात गरी उच्च शिक्षालाई अनुसन्धानात्मक तथा नवप्रवर्तनात्मक बनाउन आवश्यक रहेको बताउनुभयो ।

खुला विश्वविद्यालयका उपकुलपति प्रा डा लेखनाथ शर्माका अनुसार सम्मेलनमा अमेरिका, न्यूजिल्याण्ड, नेपाललगायतका विज्ञहरुको सहभागिता रहेको छ । सम्मेलनमा उच्च शिक्षाको नेतृत्व, शिक्षण पद्धति, कोभिड(१९ पछिको चुनौती आदिबारे छलफल हुनेछ ।
स्रोत उज्यालो अनलाईन ।