भारत सरकारसँग खरिद १० लाख कोरोना डोज अप्रिल पहिलो साता आइपुग्ने

काठमाडौं । नेपालले भारत सरकारसँग खरिद गरेको १० लाख डोज अप्रिल महिनाको पहिलो सातासम्म आइपुग्ने भएको छ ।

स्वास्थ्य तथा जनसंख्या मन्त्रालयका अधिकारीहरुका अनुसार सेरम इन्ष्टिच्युटले अप्रिलको पहिलो सातासम्म खोप पठाउने तयारी गरेको छ ।

नेपालले भारतको सेरम इन्ष्टिच्युटसँग प्रतिडोज ४ डलरको दरमा गत फागुन ५ मा अग्रिम भुक्तानी गरी २० लाख डोज खोप खरिद सम्झौता गरेको थियो । त्यसमध्ये १० लाख डोज केही दिनमै नेपाल आइपुग्यो भने बाँकी १० डोज चैत ४ गतेसम्म पठाउने सहमति थियो ।

तर सहमतिअनुसार चैत ४ मा खोप नआएपछि नेपालले खोप अभियान नै स्थगित गरेको छ ।

भारतमा पछिल्लो समय कोरोना संक्रमण तीव्र गतिमा बढ्दै गएकाले खोप निर्यातमा प्रतिबन्ध लगाएको छ । तर, नेपालले अगाडि नै रकम भुक्तानी गरिसकेकाले १० लाख डोज खोप आउने मन्त्रालयका अधिकारीहरु बताउँछन् ।

चीन सरकारले दिएको सिनोफार्म कम्पनीको ८ लाख डोज खोप यही सोमबार नेपाल आइपुग्ने समाचार अनलाइन खबरमा पोष्ट गरिएको छ ।