उचित व्यवस्थापन गर्न नरैनापुरका अग्नि पीडितको सरकारसँग माग

बाँके । बाँकेको नरैनापुरका अग्नि पीडितले आफूहरुको उचित व्यवस्थापन गर्न सरकारसँग माग गरेका छन् ।

आफूहरुको घरगोठ, खानेकुरा र लत्ताकपडा सबै जलेर नष्ट भएको भन्दै उनीहरुले उचित व्यवस्थापन गर्न माग गरेको हो ।

फुसको छानो भएकाले धेरै क्षति हुन पुगेकाले फुसको छानो विस्थापन गरेर घर निर्माणका लागि केन्द्र र प्रदेश सरकारसँग माग गरिएको नरैनापुर गाउँपालिकाका अध्यक्ष इश्तियाक अहमद साहले बताउनुभयो ।

नरैनापुर गाउँपालिका वडा नं। ४ को खोदवा गाउँमा शनिबार अपराह्न साढे तीन बजेतिर लागेको आगो गएराति १ बजे पूर्णरुपमा निभाइएको थियो ।

आगलागी हुँदा एक सय २० घर जलेर नष्ट भएका छन् । आगो निभाउने क्रममा चार जना घाइते भएका छन् ।

आगोले घर पूर्णरुपमा जलेर नष्ट भएसँगै आफूहरुले ४० वटा क्याम्प बनाएर उनीहरुलाई त्यहाँ राखिएको गाउँपालिकाका अध्यक्ष शाहले बताउनुभयो ।

आगलागीबाट करोडौंको क्षति भएको प्रारम्भिक अनुमान गरिएको छ ।