काठमाडौँ । अन्य समयमा खचाखच गाडीको लस्कर अनि मान्छेको भिडले भरिने काठमाडौँ उपत्यकाका सडक अहिले सुनसान जस्तै छन् ।
कोरोना नियन्त्रण तथा रोकथामका लागि सरकारले घोषणा गरेको निषेधाज्ञापछि सडक सुनसान बनेका हुन् ।
अन्य समयमा मानिसको भिडले भरिने पार्क, होटेल, पसलका गेट बन्द छन् । बाइक अनि ट्याक्सी पार्किङ गरेर राखिएका छन् । मानिसको आवतजावतले ठेलमठेल हुने बाटोहरू पूरै खाली छन् ।
अत्यावश्यक कामका लागि निस्किने फाट्टफुट्ट गाडी र केही बाइक भने सडकमा देखिएका छन् । चोकचोकमा ट्राफिक प्रहरीले कडाइका साथ निगरानी गरिरहेका छन् ।
अन्य समयमा डिस्टर्ब नै हुने गरी गाडीको आवाज सुनिने सडकमा प्रहरीको गाडीको आवाज मात्र बेलाबेलामा सुनिन्छ ।
अन्य समयमा जोडले बोल्दा बल्ल सुनिने सडकमा सानो स्वरले बोल्दा पनि टाढैबाट सुनिन्छ । अन्य समयमा गाडीको आवाज मात्र सुनिने काठमाडौँमा चराहरूको चिरबिर प्रष्टै सुनिन्छ ।
निषेधाज्ञाको समाचार आएपछि काठमाडौँबाट सोमबार र मंगलबार दुई दिनमा मात्रै करिब १२ लाख मानिस गाउँ फर्किए ।
काठमाडौँमै रहनेहरू ओल्लो कोठा र पल्लो कोठाका एकअर्कामा कुरा गर्दै समय बिताइरहेका छन् । बाहिर के हुँदै छ भनेर झ्यालबाट टाउको निकालेर यता र उता चिहाउँदै गरेको देखिन्छ कतिलाई ।
कोही बाल्कोनीमा निस्केर गफिँदै गरेको देखिन्छ । काम गर्ने बानी, समय कटाउन गाह्रो भयो भन्दै कोही आफ्नै घरमा तल र माथि ओहोरदोहोर पनि गरिरहेका छन् ।
कोही मोबाइलमा गेम खेलेर समय बिताइरहेका छन् भने कोही भिडियो च्याटमा काठमाडौँका सुनसान बस्ती देखाउन व्यस्त देखिन्छन् ।
माथ्लो घरको झ्यालबाट तल्लो घरका मानिससँग कुराकानी भइरहेको छ । यसअघि घरकै पल्लो कोठाका मानिससँग कुरा गर्न पुर्सद नहुनेहरू अहिले नजिकैको घरका मानिससँग गफिइरहेका छन् ।
कतिपय नुहाइधुवाइ अनि घरको सरसफाइमा जुटिरहेका छन् । साना केटाकेटीहरू टिभीमा झुम्मिएका छन् । युवायुवती टिकटक बनाउँदै रमाइरहेका छन् । कोही अल्छी मानेर हाई कार्दै बसेका छन् ।
काठमाडौँका सडकहरू सुनसान देखिए पनि आकासमा भने हवाइजहाजको आवाज प्रस्ट सुनिन्छ । निषेधाज्ञामा हवाई उडान बन्द नगरेका कारण हवाइजहाजको आवाजले सुनसान काठमाडौँ सहरलाई बेलाबेलामा डिस्टर्ब गरिरहेको छ ।
सार्वजनिक यातायात बन्द गरिए पनि परिचय पत्र भिरेर अफिस जाने आउनेहरू भने बाटोमा फाट्टफुट देखिन्छन् । अनि अन्य ढुवानीका लागि सञ्चालित गाडीहरू पनि खाली सडकमा निस्फिक्री चलिरहेकै छन् ।
मानिस स्वतन्त्र रूपमा निस्फिक्री हिँड्न र काम गर्न रुचाउने भएका कारण कतिपयलाई घरमा मात्र बस्दा उकुसमुकुस ‘फिल’ भइरहेको छ । कतिपय एकैछिन त हो भन्दै बाहिर निस्केर हिँहिरहेका छन् ।
प्रहरी भ्यानको आवाज सुनेपछि मात्र दौडेर घरभित्र पसेको दृश्य पनि देखिन्छ । कतिपयले आधा मात्र पसल खोलेर सामानहरू किनबेच गरिरहेका पनि छन् ।
यातायात बन्द गरिएका कारण कतिपय नागरिक आक्रोशित पनि छन् भने कतिपयले सकारात्मक रुपमै लिइरहेका छन् ।
कतिपय भन्छन्, ‘सरकारले समयमा केही गर्न सक्दैन, जब सङ्कट आइपर्छ, अनि जनतालाई हैरानी दिने काम गर्छ । जताबाट पनि जनतालाई नै दुःख दिने काम हो ।’
पछिल्लो समय उपत्यकामा सङ्क्रमितहरू दिनानुदिन थपिँदै गएका छन् । हरेक समय मास्कको प्रयोग गर्नुका साथै सरसफाइमा विशेष ध्यान दिन डाक्टरहरूले सुझाव दिइरहेका छन् ।
सरकारले अपनाएको यो विधिलाई सकारात्मक रुपमा लिएर सबैजना घर घरमा रहेर सिर्जनात्मक कार्यमा व्यस्त रहँदै आफू अनि आफ्नो परिवारका सदस्यलाई कोरोनाबाट जोगाऔँ अनि जोगिऔँ ।