डा. केसीसँग अविलम्ब वार्ता गरी जीवन रक्षा गर्न देउवाको प्रधानमन्त्रीलाई आग्रह

काठमाडौँ । प्रमुख प्रतिपक्षी नेपाली कांग्रेसका सभापति शेरबहादुर देउवाले डा. गोविन्द केसीको मागका बारेमा समाधान खोज्नका लागि प्रधानमन्त्रीसँग आग्रह गर्नुभएको छ ।

उहाँले अनशनरत डा. केसीसँग अविलम्ब वार्ता गरी जीवन रक्षा गर्न ढिलाइ नगर्न प्रधानमन्त्रीसँग आग्रह गर्नुभएको हो ।

देउवाले आइतबार प्रेस विज्ञप्ति जारी गर्दै डा. केसीको स्वास्थ्य अवस्था जटिल बन्दै गएका कारण उहाँको जीवन रक्षा गर्न ढिलाइ नगर्न आग्रह गर्दै, ढिलाइको दुष्परिणाम गम्भीर हुने चेतावनी समेत दिनुभयो ।

२१ दिनदेखि अनशनमा बस्दै आएका डा। केसीको स्वास्थ्य स्थिति चिन्ताजनक बनिसक्दा समेत सरकारले वार्ता गरेर माग सम्बोधन गर्न कुनै गम्भीरता नदेखाउनु अत्यन्तै दुःखद र गम्भीर विषय भएको देउवाको भनाइ छ ।

वर्तमान प्रधानमन्त्रीकै अग्रसरतामा ०७५ साउनमा डा. केसीसँग गरिएको सम्झौतालाई माघ महिनामा उल्लंघन गरेर द्वन्द्वको बीउ सरकारले त्यसबेला नै रोपेको उहाँको आरोप छ ।