भित्ताखर्कमा झोलुङ्गे पुल निर्माण, स्थानीयलाई आवतजावतमा सहजता

सोलुखुम्बु । सोलुदुधकुण्ड नगरपालिका वडा नम्बर ७ भित्ता खर्कमा झोलुङ्गे पुलको निर्माण कार्य सम्पन्न भएको छ ।
चार महिना अवधिमा पुलको निर्माण कार्य सम्पन्न गरिएको ७ नम्बर वडा कार्यालयले जनाएको छ ।

कोशी प्रदेश सरकार अन्तर्गत भौतिक मन्त्रालयबाट विनियोजित बजेटबाट गौतम निर्माण सेवा निर्माण कम्पनीद्धारा निर्मित पुलको लम्बाई २११.२० मिटर रहेको छ ।

एक करोड ६७ लाख रुपैयाँ लागतमा पुल निर्माण कार्य सम्पन्न भएको निर्माण कम्पनीले जनाएको छ ।
पुल निर्माण पश्चात् विद्यार्थी, स्थानीय नागरिक, बटुवा लगायतलाई आवतजावतमा सहजता मिलेको सोलुदुधकुण्ड नगरपालिका वडा नम्बर ७ का वडा अध्यक्ष सोनाम ग्याल्जेन शेर्पाले जानकारी दिनुभयो । उहाँका अनुसार सो बाटोमा आवतजावत गर्दा खोलाबाट हिँड्नुपर्ने र जङ्गली जनावर बाघ, भालु लगायतको त्रास खेप्नुपरेको समस्या थियो । उहाँ भन्नुहुन्छ, ‘अब बाटोको दुरी छोटिनका साथै जङ्गली जनावरको त्रास कम भएको छ ।’

केही प्रक्रिया पूरा गरी औपचारिक रूपमा उद्घाटन गरिने सोलुदुधकुण्ड नगरपालिका वडा नम्बर ७ का वडा अध्यक्ष सोनाम ग्याल्जेन शेर्पाको भनाइ छ ।