खुम्बु: थामेमा वर्षाका कारण ५ घर पूर्ण रूपमा क्षति

सोलुखुम्बु । खुम्बु पासाङल्हामु गाउँपालिका ५ थामेमा अविरल वर्षाका कारण ५ घर पूर्ण रूपमा क्षति भएको छ । भदौ १५ गते बेलुकी परेको अविरल वर्षाका कारण ५ घर पूर्ण रूपमा क्षति र ६ घरमा आंशिक रूपमा क्षति भएको खुम्बु पासाङल्हामु गाउँपालिका प्रमुख प्रशासकीय अधिकृत नवराज गौतमले जानकारी दिनुभयो ।

पीडितलाई सकुशल उद्धार गरी हाल अस्थायी बसोबासको व्यवस्था गरिएको खुम्बु पासाङल्हामु गाउँपालिका अध्यक्ष मिङमा छिरी शेर्पाले जानकारी दिनुभयो ।

वर्षाका कारण बिजुलीको पोलमा क्षति भई विद्युत् प्रसारण र सञ्चार सेवा अवरुद्ध भएको गाउँपालिकाले जनाएको छ ।
गाउँपालिका अध्यक्ष शेर्पाका अनुसार गत वर्ष साउन ३२ गते हिमताल फुटेर बाढी गएको सोही स्थानको जोखिम भएका घर बगाएको हो ।

गाउँपालिकाको प्राविधिक टोली घटना स्थलतर्फ गइसकेको गाउँपालिकाले जनाएको छ ।