सोलुखुम्बु । आर्थिक वर्ष ०७६÷०७७ मा सोलुदुधकुण्ड नगरपालिका भित्रका १ सय ५७ जनाले माटो परिक्षण गराएका छन् । कृषि ज्ञान केन्द्र सोलुखुम्बु र सोलुदुधकुण्ड नगरपालिका कृषि शाखाको संयुक्त आयोजनामा माटो शिविर कार्यक्रम अन्र्तगत यस वर्ष पनि कृषकहरुले माटो परिक्षण गराएका हुन ।
०७६ फागुन ११ गते सल्लेरीको नयाँ बजारमा आयोजित माटो शिविरमा ६३ जना कृषकहरुले माटो परिक्षण गराएको कृषि ज्ञान केन्द्र सोलुखुम्बुका निमित्त प्रमुख कुल बहादुर राईले जानकारी दिनुभयो । यस्तै सोलु दुधकुण्ड नगरपालिका वडा नम्बर ११ तिंलामा फागुन १२ गते ९४ जना कृषकहरुले माटो परिक्षण गराएको पनि राईले बताउनुभयो ।
कृषि ज्ञान केन्द्रको तथ्यांक अनुसार सोलुखुम्बुका ७० प्रतिशत कृषकहरु माटो परिक्षणबारे जानकार भएको पाईएको छ । अहिले आठ वटै स्थानिय तहमा कृषि शाखा स्थापना भएको कारण कृषकहरुलाई सल्लाह सुझाव लिनको लागि सहजता भएसँगै कृषकहरुमा माटो परिक्षणबारे जानकारी भएको कृषि ज्ञान केन्द्र सोलुखुम्बुका निमित्त प्रमुख कुल बहादुर राईले बताउनुभयो ।