काठमाण्डौ – संस्कृति, पर्यटन तथा नागरिक उड्यान मन्त्रालयले आन्तरिक वायु सेवा कम्पनीलाई पूर्ण सिट क्षमतामा यात्रु बोक्न दिने भएका छन् ।
यसअघि सरकारले ५० प्रतिशत सिट क्षमतामा मात्रै जहाज उडाउन पाउने निर्णय गरेपछि वायु सेवा सञ्चालक संघले जहाज नै नउडाउने निर्णय गरेको थियो ।
पर्यटन मन्त्रालयले कुल उडानको २५ प्रतिशत मात्रै जहाज उडाउन पाइने तर पूर्ण सिट क्षमतामा उडान गर्ने प्रस्ताव मन्त्रिपरिषदमा लगेको थियो ।
अब कुल उडान सङ्ख्याको २५ प्रतिशत मात्रै आन्तरिक उडान हुनेछन् तर जहाजले पूर्ण क्षमतामा यात्रु बोक्न पाउने छन् ।
मन्त्रालयले प्राधिकरणलाई पठाएको पत्रमा २५ प्रतिशत मात्र उडान हुने, यात्रुले स्वस्थ भएको स्वघोषणा गर्नुपर्ने र मास्क अनिवार्य लगाउनुपर्ने लगायतको कुरा उल्लेख गरिएको छ ।
