उपसभामुख हटाउन सत्तारूढ दुई दलको अग्रसरतामा सांसदको हस्ताक्षर सङ्कलन

काठमाडौँ । प्रतिनिधि सभाका उपसभामुख इन्दिरा रानाले पद अनुकूल आचरण नगरेको भन्दै सत्ता साझेदार नेपाली कांग्रेस र नेकपा (एमाले) ले पदमुक्तको प्रस्ताव दर्ताका लागि हस्ताक्षर सङ्कलन गरेका छन् । सत्तारूढ दुई दलको अग्रसरतामा सांसदको हस्ताक्षर सङ्कलन गरिएको हो ।

दुई दलले आफूबाहेक सरकारमा सहभागी र विपक्षमा रहेका दलका प्रतिनिधिसँग पनि छलफल गरेका छन् । अन्य दलको सकारात्मक सङ्केत भए पनि हस्ताक्षर भने गरिसकेका छैनन् । मङ्गलबार नै प्रस्ताव दर्ताको तयारी भए पनि सत्तारूढ दलभित्रको विमति र रानासमेत कार्यक्रमका सिलसिलामा विदेश रहेकाले अन्तिम समयमा रोकिएको छ ।

२०७९ माघ ७ गते उपसभामुख निर्वाचित रानाले २०७९ फागुनमा भिसा सहजीकरणका लागि नेपालस्थित अमेरिकी दूतावासलाई लेखेको पत्र डेढ वर्षपछि बाहिर आएको थियो । २०८० साउनमा मात्र रानाको पत्र बाहिर आएको थियो । रानाको दल र संसद्सँग समेत सम्बन्धित नरहेका व्यक्तिको भिसा प्रक्रियाका लागि पदको दुरुपयोग भएको त्योबेला नेपाली कांग्रेसले विरोध गरेको थियो । पत्र लेखको अढाई वर्षपछि सोही प्रकरणलाई लिएर सत्ता साझेदार दलले पुनः आचरण अनुकूल काम नगरेकामा प्रस्ताव दर्ताको तयारी थालेका हुन् । यसअघि प्रस्तावको तयारी भए पनि संसद्को अङ्कगणितका कारण रोकिएको थियो ।

प्रस्तावको तयारी भए पनि राना भदौ ३० गते नै अमेरिका प्रस्थान गरेकाले देशबाहिर रहेको अवस्थामा प्रस्ताव दर्ता गर्दा नकारात्मक सन्देश जाने भन्दै अन्तिम समयमा रोकिएको थियो । तत्कालका लागि एक चौथाइ सदस्यको हस्ताक्षर पर्याप्त हुने भए पनि पारितका लागि तत्काल कायम सङ्ख्याको दुई तिहाइ आवश्यक पर्छ ।

कांग्रेस र एमाले दुवैले उपसभामुखको विषयमा अब खुला छलफल हुने बताएका छन ।