२४ घण्टामा ११५४ जनामा कोरोना संक्रमण पुष्टि

काठमाडौं । पछिल्लो २४ घण्टामा नेपालमा थप १ हजार १ सय ५४ जनामा कोरोना भाइरसको संक्रमण पुष्टि भएको छ ।

स्वास्थ्य तथा जनसंख्या मन्त्रालयका अनुसार देशभरका प्रयोगशालामा ९ हजार ५ सय ३३ जनाको पिसिआर परीक्षण गर्दा १ हजार १ सय ५४ जना संक्रमित भेटिएका हुन् ।
नेपालमा कोरोना भाइरसबाट संक्रमित हुनेको संख्या ६५ हजार २ सय ७६ पुगेको छ ।

सोमबार थपिएकामध्ये काठमाडौं उपत्यकाका मात्रै ६ सय ७४ जना छन् । मन्त्रालयका अनुसार पछिल्लो २४ घण्टामा काठमाडौंमा ५ सय ३८ जना, भक्तपुरमा ७४ र ललितपुरमा ६२ जना कोरोना संक्रमित थपिएका हुन् ।

यसैगरी हाल सक्रिय संक्रमितको संख्या १७ हजार ६ सय ११ छ । तीमध्ये संस्थागत आइसोलेसनमा ८ हजार ९ सय २१ जना र होम आइसोलेसनमा ८ हजार ६ सय ९० जना छन् ।

यसैगरी पछिल्लो २४ घण्टामा कोरोना भाइरस संक्रमण निको भई १ हजार ५ जना डिस्चार्ज भएका छन् ।

यससँगै नेपालमा हालसम्म कोरोनामुक्त हुनेको संख्या ४७ हजार २ सय ३८ पुगेको छ ।

यसैगरी पछिल्लो २४ घन्टामा कोरोना भाइरसको संक्रमणका कारण थप १६ जनाको मृत्यु भएको छ । योसँगै कोरोना संक्रमणबाट मृत्यु हुनेको संख्या ४ सय २७ पुगेको छ ।
आजको न्यूजबाट साभार