काठमाण्डौ – नेपाल राष्ट्र बैंकले विदेशबाट आफन्तलाई सिधै पैसा पठाउन मिल्ने गरी रेमिट्यान्स सम्बन्धी नियममा परिवर्तन गरेको छ । रेमिट्यान्स प्रदायक कम्पनी र बैंक तथा वित्तीय संस्थाले नेपालीहरु काम गरिरहेका देशका डिजिटल भुक्तानी सेवा प्रदायकहरुसँग मिलेर नेपालमा रकम भित्र्याउन सक्ने र ग्राहकलाई पनि डिजिटल माध्यममार्फत नै भुक्तानी गर्न पाउने गरी राष्ट्र बैंकले निर्देशन जारी गरेको छ ।
राष्ट्र बैंकले सूचनामार्फत विदेशमा रहेका नेपालीले त्यहाँका विद्युतीय भुक्तानी सेवा प्रदायकसँग आबद्ध भएर सोझै नेपालका ई सेवा, खल्ती, आईएमई पे, लगायतका वालेट र अन्य डिजिटल भुक्तानी सेवा प्रदायकमा पैसा पठाउन सक्ने जनाएको हो ।
अब विदेशबाट आएको रेमिट्यान्स मोबाइल बैंकिङ, इन्टरनेट बैंकिङ, वालेटलगायतका माध्यममार्फत सिधै ग्राहकले भुक्तानी पाउने छन् ।
रेमिट्यान्स कम्पनीले डिजिटल भुक्तानी सेवा प्रदायकमार्फत पठाएको रकम प्रापकले रकमान्तर गर्न वा आफै उपस्थित हुन नसक्ने अवस्थामा वालेटमा पठाउने र तोकिएको सीमाभन्दा बढी भएको रकम प्रापकको बैंक खातामा स्थानान्तरण हुने व्यवस्था मिलाउनु पर्नेछ ।
यसका लागि राष्ट्र बैंकले रेमिट्यान्स सेवा प्रदायकलाई केही शर्त भने तोकेको छ । नेपालीले काम गर्ने देशबाट रकम भित्र्याउँदा रेमिट्यान्स कम्पनीले सम्बन्धित देशको डिजिटल भुक्तानी सेवा प्रदायक संस्थासँग आबद्ध भएको हुनुपर्नेछ ।
अन्तरदेशीय कारोबारको लागि अपनाउनुपर्ने सुरक्षा व्यवस्था कडाइका साथ पालना गरेको हुनुपर्नेछ । यस्तै सुरक्षित रुपमा डिजिटल कारोबारको अभिलेख राखेको हुनुपर्ने राष्ट्र बैंकका कार्यकारी निर्देशक तथा विदेशी विनिमय व्यवस्थापन विभागका प्रमुख बमबहादुर मिश्रले जानकारी दिनुभयो।
