खुम्बु पासाङल्हामु गाउँपालिका अध्यक्ष शेर्पाद्धारा सुर्के–नाक्चुङ बेलिबृजको उद्धघाटन

सोलुखुम्बु । खुम्बु पासाङल्हामु गाउँपालिका वडा नम्बर २ सुर्के–नाक्चुङ जोड्ने बेलिबृजको उद्धघाटन गरिएको छ ।
आज सोमबार खुम्बु पासाङल्हामु गाउँपालिका अध्यक्ष मिङमा छिरी शेर्पाले बेलिबृजको उद्घाटन गर्नुभएको हो ।

उद्घाटन कार्यक्रमलाई सम्बोधन गर्दै खुम्बु पासाङल्हामु गाउँपालिका अध्यक्ष मिङमा छिरी शेर्पाले सिल्क हाइड्रोपावर प्रालिसँगको सहकार्यले गाउँपालिकाको विकासमा टेवा पुगेको बताउनुभयो । उहाँले बेलिबृज निर्माणसँगै सञ्चालनमा ल्याएकोमा खुसी व्यक्त गर्दै सिल्क हाइड्रोपावरलाई धन्यवाद दिनुभयो । अध्यक्ष शेर्पाले बेलिबृज सञ्चालनमा आएसँगै स्थानीयलाई आवतजावतमा सहज हुनका साथै हाइड्रोपावरको कामले समेत तीव्रता पाउने उल्लेख गर्नुभयो ।

४६ मिटर लम्बाइ रहेको उक्त बेलिबृज सिल्क हाइड्रोपावर प्रालिले साढे चार करोड लगानीमा ३ महिना अवधिमा निर्माण सम्पन्न गरेको सिल्क हाइड्रोपावरका कन्स्ट्रक्सन म्यानेजर विश्वास पण्डितले जानकारी दिनुभयो । उहाँका अनुसार २०८१ चैत्रमा निर्माण सुरु गरिएको बेलिबृजको ज्येष्ठमा निर्माण कार्य सम्पन्न गरी सञ्चालनमा आएको हो ।
चार करोड लागतमा सुर्के–दुधकोशी–नाक्चुङ साढे ३ किलोमिटर ट्र्याक ओपन गरिएको सिल्क हाइड्रो प्रालिले जनाएको छ ।
बेलिबृज निर्माण सम्पन्न भएसँगै सञ्चालनमा आए पश्चात् नाक्चुङदेखि सुर्के सिधा आवतजावतमा सहज भएको स्थानीय लाक्पा रीन्जी शेर्पाको भनाइ छ ।
२५ मेगावाट क्षमताको सिल्क हाइड्रोपावर प्रालि खुम्बु पासाङल्हामु गाउँपालिका वडा नम्बर २ स्थित लुम्दिङ खोलाबाट विद्युत् उत्पादन गर्ने तयारीमा रहेको सिल्क हाइड्रोपावर प्रालिका अध्यक्ष कुमार खरेलले जानकारी दिनुभयो । विगत २ वर्ष देखि निर्माणको क्रममा रहेको र अबको करिब डेढ वर्षभित्र योजना सम्पन्न गरी विद्युत् उत्पादन गर्ने लक्ष्य रहेको अध्यक्ष खरेलको भनाइ छ । सिल्क हाइड्रोपावरले थामडाँडा देखि सुर्केसम्म सडक निर्माणमा सहकार्य गरेको गाउँपालिकाले जनाएको छ ।