सोलुखुम्बु । पर्यटकीय क्षेत्र लुक्लामा पहिलो ब्याडमिन्टन कभर्ड हल निर्माण गरिएको छ । सगरमाथाको प्रवेशद्वारको केन्द्र विन्दुको रूपमा रहेको तेन्जिङ हिलारी विमानस्थल नजिकै २ कोर्टको कभर्ड हल खुम्बु पासाङल्हामु गाउँपालिकाले निर्माण गरेको हो ।
कोशी प्रदेश अन्तर्गत सामाजिक विकास मन्त्रालय र खुम्बु पासाङल्हामु गाउँपालिकाको संयुक्त आर्थिक लगानीमा वडा नम्बर २ लुक्लामा ब्याडमिन्टन कभर्ड हलको निर्माण गरिएको खुम्बु पासाङल्हामु गाउँपालिका अध्यक्ष मिङमा छिरी शेर्पाले जानकारी दिनुभयो । अध्यक्ष शेर्पाका अनुसार कभर्ड हल निर्माणका लागि कोशी प्रदेश सभा सदस्य एवं पूर्व सामाजिक विकास मन्त्री बुद्धिकुमार राजभण्डारीको सहयोगमा विनियोजित २५ लाख र गाउँपालिकाको एक करोड ५३ लाख रुपैयाँ गरी एक करोड ७८ लाख रुपैयाँ लागतमा निर्माण सम्पन्न भएको हो ।
कभर्ड हल निर्माणका लागि आर्थिक वर्ष ०७६/७७ देखि ०८०/०८१ तीन आर्थिक वर्षमा कोशी प्रदेश र गाउँपालिकाबाट क्रमागत रूपमा बजेट विनियोजन गरिएको गाउँपालिकाले जनाएको छ ।
हिमालयन क्लबको स्वामित्वमा रहेको जग्गामा कोशी प्रदेश र गाउँपालिकाको संयुक्त आर्थिक लगानीमा स्टिल स्ट्रक्चरबाट निर्मित ब्याडमिन्टन कभर्ड हल सञ्चालनका लागि हिमालयन क्लबलाई हस्तान्तरण गरिने गाउँपालिका अध्यक्ष शेर्पाले बताउनुभयो ।
पछिल्लो समय ब्याडमिन्टन खेलप्रति रुचि बढ्न थालेको र भावी पुस्ताको आकर्षण बढाउन लुक्ला क्षेत्रमा सुविधा सम्पन्न कर्भड हलको आवश्यकता महसुस गरी निर्माण समेत गरिएको खुम्बु पासाङल्हामु गाउँपालिका वडा नम्बर २ का वडा अध्यक्ष आङ फूर्वा शेर्पाको भनाइ छ । हावा, पानी मात्रै नभएर राती पनि निर्बाध रूपमा खेल्न सकिने वडा अध्यक्ष शेर्पाको भनाइ छ ।
बजेट अभावका साथै ढुवानीमा समस्याका कारण निर्माण कार्यमा चुनौती रहेको लुक्ला टोल विकास संस्थाका अध्यक्ष सोनाम दोर्जि शेर्पाले बताउनुभयो । उहाँका अनुसार हल निर्माणका लागि आवश्यक सम्पूर्ण सामाग्री काठमाडौँदेखि टाक्सिन्दुसम्म गाडीमा र टाक्सिन्दुदेखि लुक्ला सम्म हेलिकप्टरबाट ढुवानी गरिएको थियो ।
सो कभर्ड हलको कोशी प्रदेश सभा सदस्य एवं पूर्वमन्त्री बुद्धिकुमार राजभण्डारीको प्रमुख आतिथ्यतामा यहि असार ७ गते औपचारिक रूपमा उद्धघाटन गरिने कार्यक्रय तय भएको छ । उद्धघाटनको अवसरमा आगामी असार ७ र ८ गते जिल्ला स्तरीय खुला पुरुष ब्याडमिन्टन प्रतियोगिताको आयोजना गरिएको गाउँपालिकाले जनाएको छ ।
गाउँपालिकाका अनुसार पर्यटकीय क्षेत्र खुम्बु पासाङल्हामु गाउँपालिकामा पहिलो ब्याडमिन्टन कभर्ड हलको रूपमा निर्माण गरिएको २ कोटको हलमा नियमानुसार एवं प्रक्रियागत रूपमा सबै इच्छुक खेलाडीहरूले खेल्न पाउने व्यवस्था गरिएको छ ।
—
