केकी, रीमा लगायतको टिमले ‘डान्स मास्टर लिल चाम्स’ आयोजना गर्दै

काठमाडौँ । डान्सिङ रियालिटी शो ‘डान्स मास्टर लिल चाम्स’ आयोजना हुने भएको छ । ‘थ्रि प्रोडक्सन’ले ‘नेपा प्रोडक्सन’सँग सहकार्य गर्दै यो शो निर्माण गर्न लागेको हो ।

यसअघि चलचित्र ‘कोहलपुर एक्सप्रेस’ र कमेडी च्याम्पियन’ निर्देशन गरिसकेका विशाल भण्डारीले निर्देशन गर्नेछन् ।

यस्तै नायिका केकी अधिकारी, रीमा विश्वकर्मा, विशाल भण्डारी, रोहिया महर्जन, रीना महर्जन, गम्भिरमान सिंह निर्माताको रुपमा रहनेछन् ।

यस शोमा १३ बर्ष भन्दा कम उमेरका बालबालिकाले मात्र सहभागीता जनाउन पाउने आयोजकले जानकारी दिएका छन् ।

शोको सुपर जजको रुपमा सारंगा श्रेष्ठ रहनेछिन् । यस्तै, निर्णायकहरुमा तेरिया मगर, सुशान्त खत्री, रोहिया महर्जन रहनेछन् । शोको संचालन रीमा विश्वकर्मा र सुमन कोइरालाले गर्नेछन् ।

आफनो प्रतिभा भएपनि राम्रो प्लेटफर्मको खोजीमा नेपालका बालबालिका विदेश पुगिरहेको बेला प्रतिभा भएका बालबालिकालाई अवसर दिने उद्देश्यले कार्यक्रम सुरु गर्न लागिएको निर्देशक विशाल भण्डारीको भनाइ छ ।

रियालिटी शोको विजेताले २५ लाख नगद पुरस्कार पाउनेछन् । यस्तै, दोश्रो हुनेले १५ र तेश्रो हुनेले नगद १० लाख पाउनेछन् । विजेताले कोरियोग्राफरसँग पाउने पुरस्कारको ५० प्रतिशत साझेदारी गर्नुपर्नेछ ।