काठमाडौँ । गतहप्ताको तुलनामा यो हप्ता काठमाडौँ उपत्यकामा तरकारीको मूल्य घटेको छ ।
उपभोक्ताको सङ्ख्या घटेसँगै तरकारीजन्य सामानको मूल्यमा तीव्र गिरावट आएको हो ।
कोरोना भाइरसको सङ्क्रमणका कारण सरकारले निषेधाज्ञा जारी गरेसँगै उपत्यका छाडेर गाउँ फर्किनेको सङ्ख्या अधिक भएकाले उपत्यकामा उपभोक्ता घटेका हुन् ।
उपत्यकाका व्यापारीहरूका अनुसार यतिबेला तरकारी किन्न आउने मानिस एकदमै कम छन् । प्रायः मानिस गाउँ फर्किसके, यतै भएका पनि कोरोना त्रासका कारण तरकारी किन्न आउँदैनन् ।
दिनैपिच्छे तरकारी किन्न निस्किँदा कोरोना जोखिम हुने भएपछि अहिले धेरैले दलहन, गेडागुडी किनेर स्टक गरेका छन् । हरियो तरकारी पनि केही दिनलाई पुग्ने गरी किनेर स्टक गरिएका कारण तरकारी बजार–पसलसम्म पुगेर तरकारी किन्नेको सङ्ख्या न्यून छ ।
आइतबार काठमाडौँको कपनस्थित तरकारी बजारमा गरिएको स्थलगत रिपोर्टिङ क्रममा एक सातामै तरकारीको भाउ ५० देखि ६० प्रतिशतसम्म घटेको पाइयो । गतसातासम्म सय रुपैयाँ किलोमा पाउने काउली अहिले ६० देखि ८० रुपैयाँमा किनबेच भइरहेको छ ।
प्रतिकिलो एक सय २० रुपैयाँ पर्ने बन्दा ५०, ९०–सय रुपैयाँमा किनबेच भइरहेको गोलभेँडा ४० रुपैयाँ, ६० रुपैयाँको सिमला मिर्च ३० रुपैयाँ पुगेको छ ।
यसैगरी ६० रुपैयाँ प्रतिपाउ रहेको लसुन अहिले ५० रुपैयाँमा झरेको छ । प्रतिकिलो दुई सय ५० रहेको सिमी–बोडी अहिले सय रुपैयाँमा बिक्री भइरहेको व्यापारी बताउँछन् ।
यस्तै प्रतिकिलो ७० देखि १२० सम्म पाउने फर्सी अहिले ५० रुपैयाँ, ४० रुपैयाँ पाउको खुर्सानी ३० रुपैयाँ र प्रतिकिलो ६० रुपैयाँ पर्ने अदुवा अहिले ४० रुपैयाँमा किनबेच भइरहेको छ । यस्तै प्रतिकिलो एक सय ३० रुपैयाँको गाँजर र मूला अहिले ५० रुपैयाँ पुगेको छ ।
‘मान्छे नै छैनन् । मान्छे टन्न भए पो… अहिले त खाने मान्छे नै छैनन् । पहिला व्यापार गर्न भ्याइनभ्याइ हुन्थ्यो लकडाउनले खत्तम,’ तरकारी व्यापारी दिल बहादुर भूजेल भन्छन्, ‘खाने मान्छै गाउँ गै’हाले । पहिला दिनमा १० हजारसम्मको व्यापार हुन्थ्यो, अहिले दुई हजार पनि बल्ल बल्ल… हाहाहा’
यस्तै अर्का तरकारी व्यापारी भुवन ओझा भन्छन्, ‘के गर्नु हौ खै, तरकारीको भाउ घटे नि बढे नि व्यापार भा’छैन । जनता सबै गाउँ गए । किन्ने मान्छे नभएर तरकारी कुहिरा’छ । घटे नि गाह्रो, बढे नि गाह्रो ।’
तरकारीको मूल्य घटेर व्यापारीको पीडा एकापट्टि छ भने ग्राहकलाई भने राहत मिलेको छ । अन्य समयमा तरकारी महँगो भयो भनेर गुनासो गर्दै फर्कने ग्राहक अहिले राहत मिलेको बताउँछन् ।
तरकारी किन्न आएकी ग्राहक सविना खड्का भन्छिन्, ‘पहिला त्यही तरकारी महँगो पैसा तिरेर किन्नुपर्ने बाध्यता थियो भने अहिले आधा कम मूल्यमा किन्न पाउँदा लोभ लाग्छ नि…’
उनी भन्छिन्, ‘राम…राम अस्ति यही तरकारीको भाउ किनिनसक्नु थियो । अहिले जता जाँदा नि सस्तो भाउमा किन्न पाउँदा खुसी नै लाग्दोर’छ । पहिला एक किलो आउने पैसामा अहिले डबल पाउँदा के खोज्नु ?’
हरियो तरकारी भएकाले लामो समयसम्म नरहने भएका कारण उचित समयमा सबै सामान बेच्नुपर्ने स्थिति भएकाले पनि तरकारीको मूल्य कम हुन गएको तरकारी बजारका सूचना अधिकारी विनय श्रेष्ठ बताउँछन् ।
अहिलेको समयमा मानिसले घरमा स्टकमा अन्य तरकारी राखेका छन् । अर्को कुरा पहिले पूरै दिन तरकारी बेचबिखन हुन्थ्यो भने अहिले बिहान १० बजेसम्म सीमित भएकाले खपत कम हुँदै गएको प्रवक्ता श्रेष्ठ बताउँछन् ।
यसैगरी आज (वैशाख २१) को कालिमाटीको तरकारीको भाउ हेर्ने हो भने लोकल गाँजर प्रतिकिलो ५० तोकिएको छ । यस्तै टनेलको गोलभेडा प्रतिकिलो १०, घिरौँला २५, स्थानीय काउली २५, लोकल काँक्रो ४०, कुरिलो पाँच सय, हरियो अकबरे खुर्सानी एक सय ५०, सुकेको खुर्सानी तीन सय २० रुपैयाँ तोकिएको कालिमाटी फलफूल तथा तरकारी बजारको वेबसाइटमा उल्लेख छ ।
यसैगरी उपत्यकाका अन्य भित्री बस्तीहरूमा पनि तरकारीको भाउ घटेको छ । व्यापारीहरूले सबैखाले तरकारी ४० रुपैयाँ किलो, डेढ किलोको सय रुपैयाँ, सयको दुई किलो जस्ता अफर पनि ल्याएका छन्
