सोलुखुम्बू । विगत १० महिनाको अवधिमा सोलुखुम्बू जिल्लामा ८० जनाले गर्भपतन गराएका छन् ।
चालु आर्थिक वर्षमा गर्भपतन गराउनेको सङ्ख्या ८० पुगेको हो । जिल्ला अस्पताल फाप्लु सोलुखुम्बूले दिएको तथ्याङ्कअनुसार साउनदेखि वैशाख महिनासम्म २० वर्ष कम उमेरका ६ जना र २० वर्षमाथिका ७४ जनाले गर्भपतन गराएका छन् ।
यस्तै आर्थिक वर्ष २०७७–७८ मा एक सय २८ जनाले गर्भपतन गराएका थिए । गर्भपतन गराउनेमा २० वर्ष कम उमेरका आठ जना र २० वर्षमाथिका एक सय २० जना रहेको जिल्ला अस्पताल फाप्लुका ल्याब टेक्निसियन तथा सूचना अधिकारी विजयप्रकाश ठाकुरले जानकारी दिए ।
जिल्ला अस्पताल फाप्लुको अहिलेसम्मको तथ्याङ्क हेर्दा यस वर्षभन्दा अघिल्लो वर्ष गर्भपतन गर्नेको सङ्ख्या बढी देखिएको छ ।
सूचना अधिकारी ठाकुर भन्छन्, ‘गत वर्ष लकडाउन थियो, त्यो समयमा गर्भपतन गराउने सङ्ख्यामा वृद्धि भयो ।’
स्वेच्छाले बच्चा जन्माउने वा गर्भपतन गर्ने अधिकार रहेकाले कतिपयले बच्चा जन्माउन नचाहेको र अभिभावक हुन परिपक्व नभइसकेका कारण पनि धेरैले गर्भपतन गराएको ठाकुर बताउँछन् ।
जिल्ला अस्पताल फाप्लुका अनुसार हाडनाता तथा जबरजस्ती करणीका कारण धेरैले गर्भपतन गराएको पाइएको छ ।
साथै दुर्गम जिल्ला भएकाले स्वास्थ्य चौकी पुगेर यौनसम्बन्धी खुलेर विचार राख्न नसक्ने समस्याका कारण पनि गर्भपतन गराउनेको सङ्ख्यामा वृद्धि भएको हो ।
सोलुखुम्बूमा १२ हप्ताभन्दा मुनिको गर्भपतन गरिँदै आएको छ ।
