मन्त्रीपरिषदले पूर्णता पाएपछि मात्र नयाँ बजेटको कुरा टुङ्गो लाग्छ: अर्थमन्त्री शर्मा

पूर्वअर्थमन्त्री एवं पूर्व सभामुख कृष्ण बहादुर महराले कोभिड महामारीलाई कुशलतापूर्वक नियन्त्रण गरेर अर्थतन्त्रलाई चलायमान बनाउने खालको बजेट बनाउनुपर्ने सुझाव दिएका छन ।

बुधवार पूर्व अर्थमन्त्रीहरुसँगको छलफल कार्यक्रममा महराले बजेट कार्यान्वय प्रक्रियामा सुधार ल्याउनुपर्ने बताउँदै अध्यादेश बजेटलाई प्रतिस्थापन गरेर नयाँ बजेट ल्याउनुपर्ने राय राखेका थिए ।

बजेट कार्यान्वयनमा ढिलाई हुने काम नरोकिएको साथै जेठ असार तिर काम गर्ने प्रवृत्तिमा सुधार नभएको भन्दै ठूला आयोजना मात्र संघीय सरकारले संचालन गर्ने तर अन्य ससाना आयोजनाहरु प्रदेश र स्थानीय तहहरुलाई नै गर्न दिएमा मात्र संघीयताको राम्रोसँग कार्यान्वयन हुनसक्ने बताए ।

यस्तै पूर्वअर्थमन्त्री डा. रामशरण महतले अध्यादेशबाट बजेट ल्याउनु गलत भएको भन्दै अध्यादेशमा भएका सकारात्मक कुरा समावेश गर्ने र नमिलेका कुराहरुलाई सच्याएर नयाँ बजेट ल्याउनुपर्ने सुझाव दिएका छन । उनले कार्यान्वयन गर्नसक्ने बजेट ल्याउनुपर्ने सुझाउँदै कृत्रिम बजेट प्रस्तुत गर्ननहुने उल्लेख गरे ।

बैदेशिक ऋण बढाउन नहुने बताउदै स्वास्थ्य क्षेत्रको पूर्वाधारमा जोड दिनका साथै रोजगारी सृजनामा कृषि क्षेत्रलाई प्राथमिकता दिनुपर्ने बताए । यस्तै जनशक्तिको दक्षता बृद्धि गर्नेतर्फ खर्च आयोजना छनोट गर्दा नयाँ आयोजनामा भन्दा पूराना आयोजना सम्पन्न गर्नेतर्फ ध्यान दिनुपर्ने सुझाव दिएका छन ।

अर्थमन्त्री जनार्दन शर्माले विज्ञहरुको सुझाव लिएर अर्थतन्त्रलाई अहिलेको भन्दा गतिशील बनाउने प्रयत्न आफूले गर्ने बताएका छन ।

उनले उत्पादन र रोजगारीमा केन्द्रित भएर त्यसलाई सहयोग पुग्ने खालका पूर्वाधार विकास गर्ने कुरामा सरकारको ध्यान रहेको उल्लेख गर्दै मन्त्रीपरिषदले पूर्णता पाएपछि मात्र नयाँ बजेटको कुरा टुङ्गो लाग्ने बताएका छन् ।