थुलुङ दुधकोशी गाउँपालिका वडा ६ मा १० वटा टोल विकास संस्था गठन

सोलुखुम्बु । थुलुङ दुधकोशी गाउँपालिका वडा नम्बर ६ मा १० वटा टोल विकास संस्था गठन गरिएको छ । मंसिर १३ गतेदेखि सुरु गरिएको टोल विकास संस्था गठनको कार्य हिजो शनिबार सकिएको हो । अध्यक्ष, उपाध्यक्ष, सचिव र कोषाध्यक्ष साथै अन्य सदस्य गरि ११ सदस्यीय टोल विकास संस्था गठन गरिएको हो । समितिमा रहेका सदस्य बाहेक हरेक टोलका बाँकी घरधूरी पनि साधारण सदस्यमा रहने व्यवस्था गरिएको वडा अध्यक्ष महेन्द्रदीप राईले जानकारी दिनुभयो ।

हिजो शनिबारसम्म टोल विकास संस्था गठन गरि आज संस्थाका पदाधिकारीसँग बैठक बसेको छ । आज बसेको बैठकले टोल विकास नामाकरण गर्ने, टोल विकास संस्थाको दर्ता प्रक्रियामा लैजाने, सार्वजनिक संस्थाको नाम तथा सार्वजनिक स्थलहरुको अवस्था पहिचान गर्ने निर्णय गरेको छ ।

यस्तै साल्ट ट्रेडिङ कर्पोरेशन सल्लेरी शाखाबाट प्राप्त हुँदै आएको आयोडिनयुत्त नुन टोल विकास संस्थाको सुझाव अनुसार टोल आफैले टोलको नुन तोकेको स्थानमा उपलब्ध गराउने निर्णय गरिएको वडा अध्यक्ष राईले जानकारी दिनुभयो ।
विकास निर्माणको योजना तर्जुमा, शान्ति सुरक्षा, सुसासन कायम गर्न टोल विकास संस्थाको महत्वपूर्ण जिम्मेवारी रहने वडा अध्यक्ष महेन्द्रदीप राईले जानकारी दिनुभयो । वडाअध्यक्ष राईका अनुसार टोल विकास संस्था गठनको कार्यलार्ई पालिकाभरि नै तिब्रता दिइएको छ ।

टोल नम्बर १ को अध्यक्ष र सचिवमा लिला बहादुर बस्नेत र राज कुमार बस्नेत रहेका छन । यस्तै टोल नम्बर २ को अध्यक्ष र सचिवमा भत्त बहादुर गुरुङ र नन्दराज गुरुङ, टोल नम्बर ३ को अध्यक्ष र सचिवमा भुपध्वज थापा र प्रविन कुमार राई, टोल नम्बर ४ को अध्यक्ष र सचिवमा गोपाल राई र मणि कुमार राई रहेका छन ।

यसैगरि टोल नम्बर ५ को अध्यक्ष र सचिवमा फूर्तिमान तामाङ र प्रेम बहादुर तामाङ, टोल नम्बर ६ को अध्यक्ष र सचिवमा गोपाल बस्नेत र सुवास राई, टोल नम्बर ७ को अध्यक्ष र सचिवमा चतुरमान राई र चुडामणि राई, टोल नम्बर ८ को अध्यक्ष र सचिवमा रविन राई र अनजङ थुलुङ राई, टोल नम्बर ९ को अध्यक्ष र सचिवमा चिन्तामणि राई र पार्वुङ राई, टोल नम्बर १० को अध्यक्ष र सचिवमा चन्द्र कुमारी गुरुङ र गोविन्द कार्की रहेका छन ।