खुम्बु : काठमाडौँमा एकीकृत सेवा सुरु

काठमाडौँ ।  खुम्बु पासाङल्हामु गाउँपालिकाले काठमाडौँको चुच्चे पाटीमा एकीकृत सेवा सुरु गरेको छ । काठमाडौँमा अस्थायी रूपमा बसोबास गर्ने र स्थायी रूपमा पालिकाभित्र ठेगाना भएका सेवाग्राहीहरूलाई हुने सुविधालाई मध्यनजर गर्दै १८ साउनदेखि २१ साउनसम्म चार दिन एकीकृत सेवा सञ्चालन गर्ने गाउँपालिकाले जनाएको छ ।

सामाजिक सुरक्षा भत्ता नवीकरण, राष्ट्रिय परिचय पत्र वितरण, व्यवसाय नवीकरण, पञ्जिकरण साथै वडाबाट प्रदान गरिने प्रशासनिक सेवा लगायतका सेवा एकीकृत रूपमा प्रदान गरिने खुम्बु पासाङल्हामु गाउँपालिकाका प्रमुख प्रशासकीय अधिकृत नवराज गौतमले जानकारी दिनुभयो ।

खुम्बु क्षेत्रका अधिकांश नागरिक सिजनको हिसाबले काठमाडौँमा अस्थायी रूपमा बसोबास गर्दै आएका छन् ।

उच्च हिमाली क्षेत्रमा बसोबास गर्ने खुम्बु क्षेत्रका नागरिक भौगोलिक समस्या साथै मौसमको प्रतिकुलताका कारण सिधा र सहज रूपमा गाउँपालिकासम्म पुग्न असहज हुने भएकाले सामाजिक सुरक्षा भत्ता अनिवार्य रूपमा नवीकरण गर्नुपर्ने व्यवस्था अनुसार ४ दिनको लागि काठमाडौँमा एकीकृत सेवा सञ्चालन गरिएको प्रमुख प्रशासकीय अधिकृत गौतमको भनाइ छ ।

नागरिकका आवश्यकता र मागको आधारमा आगामी दिनमा एकीकृत सेवा सञ्चालन गर्ने गाउँपालिकाले जनाएको छ ।