सोलुखुम्बु । थुलुङ संस्कृति संरक्षण समाजले देउसी भैलोबाट संकलित रकमले थुलुङ जातिहरुको पुरानो सांस्कृतिक सम्पदाहरुको पुननिर्माण गर्ने भएको छ ।
थुलुङ राईहरुको भाषा, संस्कृति संरक्षण गर्ने उद्धेश्यले थुलुङ संस्कृति संरक्षण समाज थुलुङ दुधकोशी गाउँपालिका ६ मुक्लीले आयोजना गरेको देउसी भैलो कार्यक्रमबाट संकलित रकम मर्मत सम्भार प्रयोजनका लागि खर्च गर्ने भएको हो ।
संस्थाले देउसी भैलो कार्यक्रमबाट तीन लाख १५ हजार रुपैया आर्थिक संकलन गरेको थुलुङ संस्कृति संरक्षण समाजका सचिव ललित बहादुर राईले जानकारी दिनुभयो ।
सचिव राईले आर्थिक संकलन गर्नका लागि मात्र देउसी भैलो कार्यक्रम नराखिएको भन्दै हराउँदै गएका संस्कार र संस्कृतिको बारेमा जनचेतना फैलाउन साथै थुलुङ जातिहरुलाई जागरुक गराउनका लागि पनि देउसी भैलो कार्यक्रम आयोजना गरिएको बताउनुभयो ।
यस्तै संस्थाका अध्यक्ष दिलकुमार राईले थुलुङ जातिहरुको मौलिक संस्कार, संस्कृति र भेषभूषालाई जगेर्ना गर्ने संस्थाको मूल उदेश्य रहेको बताउँदै संस्थाको उद्धेश्य पूरा गर्नका लागि विभिन्न क्षेत्रमा रहेका सबै थुलुङ जातिहरु एकजुट भएर अघि बढ्नुपर्ने बताउनुभयो । उहाँले संस्थाद्धारा सबै थुलुङ जातिहरुलाई एकत्रित गर्दै लैजाने बताउँदै सबैलाई एकजुट हुनका लागि आह्वान गर्नुभयो ।
यसैगरि संस्थाका कोषाध्यक्ष अभयसेर राईले संस्थाको उद्धेश्य अनुसार आर्थिक खर्च हुने बताउनुभयो । उहाँले देउसी भैलो कार्यक्रमको आर्थिक संकलनले मात्र संस्थाको उद्धेश्य पूरा नहुने बताउँदै जिम्मेवारी तहमा रहेका सबैले आर्थिक सहयोग गर्नका लागि पनि आग्रह गर्नुभयो ।
देउसी भैलो कार्यक्रममा थुलुङ भाषाको गित, मारुनि नाच, बालगित, साथै राष्ट्रिय भाव समेटिएका गितहरुमा दिव्या, सम्झना, मनिता, युना, इच्छा, सुप्राज्ञा, दिप्लुङ, सृष्टि राई, सृष्टि गुरुङ, सुमिका लगायतका कलाकाहरुले नृत्य प्रस्तुत गरेका थिए ।
यस्तै खेतबारीमा बालि लगाएदेखि लगाएको बालिलाई संरक्षण गर्दै बालि उठाउने समयसम्मको समयसिमालाई इंकित गर्ने तोसी सीलि समेत प्रस्तुत गरिएको संस्थाका सचिव ललित बहादुर राईले जानकारी दिनुभयो । तोसि सिलीमा पूर्णिमा राई, कैलाश कुमारी राई, धनरुपा राई, बालाक्यूरी राई, हरि माया राई, पासाङ माया राई लगायत तोसी सीलिका कलाकार समूहले सीलि प्रदर्शन गरेका थिए ।
कार्तिक १०, ११ र १२ गते थुलुङ दुधकोशी गाउँपालिका २ काँगेल र मुक्लीको विभिन्न स्थानमा देउसी खेलिएको संस्थाले जनाएको छ ।
