खुम्बु क्षेत्र पुगेका आन्तरिक तथा बाह्य पर्यटकहरू फर्किन थाले

सोलुखुम्बु । पर्यटकीय सिजन सकिएसँगै विभिन्न उद्देश्यका साथ खुम्बु क्षेत्र पुगेका आन्तरिक तथा बाह्य पर्यटकहरू फर्किन थालेका छन् । तेन्जिङ हिलारी विमानस्थल (लुक्ला) बाट आज एकै दिन हवाई मार्ग हुँदै चार सय २४ जना आन्तरिक तथा बाह्य पर्यटक बाहिरिएको जिल्ला प्रहरी कार्यालय सोलुखुम्बुका प्रहरी नायव उपरीक्षक द्वारिका प्रसाद घिमिरेले जानकारी दिनुभयो ।

वहाँका अनुसार बाहिरिनेमा ३२० जना विदेशी पर्यटक रहेका छन् भने एक सय चार जना आन्तरिक पर्यटक रहेका छन् । आज एक सय १९ जना विदेशी र २७ जना नेपाली गरी एक सय ४६ जना खुम्बु क्षेत्र प्रवेश गरेका छन् । चार सय २४ जना बाहिरिँदै गर्दा एक सय ४६ जना खुम्बु क्षेत्र प्रवेश गरेका छन् । तुलनात्मक हिसाबमा बाहिरिनेको सङ्ख्या तेब्बर रहेको छ ।

यस्तै नाम्चे क्षेत्रबाट पैदल मार्ग हुँदै दुई  सय ४८ जना प्रवेश गर्दा तीन सय ८८ जना बाहिरिएको जनाइएको छ ।

यसैबीच आज तेन्जिङ हिलारी विमानस्थल (लुक्ला) बाट विभिन्न स्थानका लागि कुल १ सय ३१ उडान भएका छन् । हेलीकप्लर मार्फत एक सय ९ उडान  भएका छन् भने तारा एयरले ७,  सिता ७ र समिट एयरबाट ८ गरी कुल एक सय ३१ उडान भएको जिल्ला प्रहरी कार्यालय सोलुखुम्बुका प्रहरी नायव उपरीक्षक द्वारिका प्रसाद घिमिरेले जानकारी दिनुभयो ।

यस्तै आज फाप्लु विमानस्थलबाट नेपाल एयर लाइसन्को १ वटा उडान भएको छ ।