खुम्बुको लापाको खाका तयार, आगामी बजेटमा सम्बोधन गर्ने पालिका अध्यक्ष शेर्पाको प्रतिबद्धता

सोलुखुम्बु । खुम्बु पासाङल्हामु गाउँपालिकाको लैङ्गिक तथा सामाजिक समावेशिता उत्तरदायी स्थानीय अनुकूलन कार्य योजनाको ( LAPA) खाका तयार भएको छ । खुम्बु पासाङल्हामु गाउँपालिका र युएनडिपी नेपालको आर्थिक सहयोगमा हिमालयन ट्रस्ट नेपालले सो खाका तयार पारेको हो ।
हिमालयन ट्रस्ट नेपालका प्राविधिक परामर्शदाता डा. पासाङ याङजि शेर्पाले तयार पार्नुभएको खाकालाई आज काठमाडौँमा एक कार्यक्रम गरी सार्वजनिक गरिएको थियो ।
जलवायु परिवर्तनको प्रत्यक्ष असर पर्ने तथा जोखिम रहेको गाउँपालिका खुम्बु पासाङल्हामु गाउँपालिकाले स्थानीय तथा सरोकारवालाहरूसँग बहस तथा छलफलको आधारमा सो खाका तयार पारीएको खुम्बु पासाङल्हामु गाउँपालिका अध्यक्ष मिङमा छिरी शेर्पाले जानकारी दिनुभयो ।
खुम्बु पासाङल्हामु गाउँपालिकाको ५ वटै वडामा स्थानीय स्तरमा ७ वटा समूहगत छलफलबाट सुझाव तथा जानकारी सङ्कलन गरी खाका तयार पारिएको खुम्बु पासाङल्हामु गाउँपालिका प्रमुख प्रशासकीय अधिकृत नवराज गौतमले जानकारी दिनुभयो । उहाँका अनुसार जलवायु परिवर्तनका कारण स्थानीयले परम्परागत रूपमा भोगेको समस्या, महसुस तथा परिवर्तन साथै प्रविधिगत विकाससँगै जलवायु परिवर्तनका असरबारे बहस तथा छलफल भएको थियो ।
कार्यक्रमलाई सम्बोधन गर्दै खुम्बु पासाङल्हामु गाउँपालिका अध्यक्ष मिङमा छिरी शेर्पाले आगामी आर्थिक वर्षको नीति तथा कार्यक्रमको बजेटमा सम्बोधन गर्नका साथै निरन्तर रूपमा कार्यान्वयन गर्ने प्रतिबद्धता जनाउनुभयो । उहाँले संवैधानिक एवम् कानुनी उत्तरदायित्व तथा जिम्मेवारी पुरा गर्नका साथै राज्यले अन्तर्राष्ट्रियता गरेका प्रतिबद्धता कार्यान्वयन गर्न गाउँपालिका अग्रसर रहेको उल्लेख गर्नुभयो ।
अध्यक्ष शेर्पाले जलवायु परिवर्तन न्यूनीकरणका लागि गाउँपालिकाले जोड दिएको बताउँदै यस कार्यक्रमलाई सार्थक बनाउन सबै सरोकारवालाको उत्तिकै योगदान रहने बताउनुभयो ।  युएनडिपी नेपालका कार्यक्रम विश्लेषक दीपक केसीले जलवायु परिवर्तनका कारण राज्यले निकै ठुलो चुनौती भोगिरहेको स्मरण गराउँदै तयार पारिएको दस्ताबेजलाई कार्यान्वयनमा जोड दिन अनुरोध गर्नुभयो । हिमालयन ट्रस्ट नेपालका कार्यकारी निर्देशक डा. मिङमा नोर्बु शेर्पाले जलवायु परिवर्तनबाट पर्ने असर न्यूनीकरणका लागि सगरमाथा राष्ट्रिय निकुञ्ज क्षेत्रमा वृक्षारोपण कार्यलाई निरन्तरता दिएको बताउनुभयो ।
जलवायु परिवर्तनलाई सम्बोधन गर्ने राष्ट्रिय तथा अन्तर्राष्ट्रिय प्रतिवद्दताहरुलाई स्थानीय करण गर्नमा जोड दिने खुम्बु पासाङल्हामु गाउँपालिकाका प्रमुख प्रशासकीय अधिकृत नवराज गौतमले बताउनुभयो । कार्यक्रममा उपस्थित खुम्बुका स्थानीयहरूले जलवायुन्यूनीकरण सम्बन्धी यो कार्यक्रम निकै प्रभावकारी हुने बताउँदै आगामी नीति तथा कार्यक्रममा समावेश गर्नुपर्नेमा जोड दिएका छन् ।