अर्थमन्त्री जनार्दन शर्माले चीनबाट थप खोप खरिदको लागि प्रक्रिया अघि बढेको बताएका छन् ।
चिनियाँ राजदुत होउ यान्छीसँग शुक्रबार मन्त्रालयमा भएको भेटमा मन्त्री शर्माले खोप खरिदको लागि प्रक्रिया बढेको भन्दै चिनियाँ सहयोग र सदभाव निरन्तर रहने धारणा व्यक्त गरे ।
कोभिड महामारीमा चीनले १८ लाख डोज खोप अनुदानमा दिएकोमा चिनियाँ सहयोगको लागि धन्यवाद ज्ञापन गर्दै चिनियाँ सहयोगमा नेपालमा सञ्चालित विभिन्न आयोजनाहरूको कार्यन्वयनमा अनुगमन गरी देखिएका समस्या समाधान गर्न र कार्यसम्पन्न गर्न सरकारको तर्फबाट तदारुकता रहने प्रतिवद्धता व्यक्त गरे ।
उनले चिनियाँ लगानीमा अघि बढिरहेका सडक, जलविद्युत, विमानस्थललगायतका निर्माणाधीन परियोजनाहरू सम्पन्न गर्नको लागि नेपाल सरकारले गर्नुपर्ने कामहरूको सम्बन्धमा गम्भीरतापूर्वक ध्यान दिने बताए ।
भेटको क्रममा चिनियाँ राजदुत होउले चिनियाँ जनता र त्यहाँको कम्युनिष्ट पार्टीसँग नेपाली जनता र यहाँका राजनीतिक दलहरूको राम्रो सम्बन्ध रहेको उल्लेख गर्दै कोभिड महामारीविरुद्धको लडाइमा आफूहरू नेपालको साथमा रहँदै आएको बताइन् ।
चीनले यसअघि नै नेपाललाई १८ लाख डोज खोप अनुदानमा दिइसकेको र थप १६ लाख डोज अनुदानको खोप पनि चाँडै प्राप्त गर्ने जानकारी दिएकी छन् ।
