तीन कम्पनिले पाए आइपिओ निष्कासन गर्ने अनुमति

काठमाडौँ । नेपाल धितोपत्र बोर्ड (सेबोन) ले साधारण सेयर (आइपिओ) निष्कासन गर्न विभिन्न तीन वटा कम्पनीलाई अनुमति प्रदान गरेको छ । बोर्डले न्यादी हाइड्रोपावर कम्पनी लिमिटेड, साहस उर्जा लिमिटेड र बुद्धभूमि नेपाल हाइड्रोपावर कम्पनी लिमिटेडलाई आइपिओ निष्कासन गर्न अनुमति दिएको हो ।

साहस उर्जा कम्पनीले आयोजना प्रभावित क्षेत्रका नागरिक र सर्वसाधारणका लागि प्रतिकित्ता सय रुपैयाँ अङ्कित दरमा एक अर्ब पाँच करोड रुपैयाँ बराबरको एक करोड पाँच लाख कित्ता साधारण सेयर (आइपिओ) निष्कासनका लागि मङ्सिर २४ गते निवेदन पेश गरेको थियो ।

बोर्डले साउन १४ गते साहस उर्जालाई अनुमति दिएको हो । कम्पनीको उक्त साधारण सेयर सार्वजनिक गर्न निष्कासन तथा बिक्री प्रबन्धकको काम एनआइबीएल एस क्यापिटल लिमिटेडले गर्नेछ ।

यस्तै, न्यादी हाइड्रोपावर कम्पनी लिमिटेडले प्रतिकित्ता सय रुपैयाँ अङ्कित दरमा ४० करोड ५० लाख रुपैयाँ बराबरको ४० लाख ५० हजार कित्ता आइपिओ निष्कासनका लागि मंसिर १० गते बोर्डमा निवेदन पेश गरेकोमा साउन ११ गते आइपिओ निष्कासनका लागि अनुमति पाएको हो ।

कम्पनीको उक्त आइपिओमा निष्कासन तथा बिक्री प्रबन्धकको काम ग्लोबल आइएमई क्यापिटलले गर्नेछ ।

यस्तै, बुद्धभूमि नेपाल हाइड्रोपावर कम्पनी लिमिटेडले प्रतिकित्ता सय रुपैयाँ अङ्कित दरमा १२ करोड रुपैयाँ बराबरको १२ लाख कित्ता आइपिओ निष्कासन गर्न निवेदन पेश गरेको हो ।

माघ ८ गते बोर्डमा निवेदन पेश गरेपछि साउन १४ गते उसले अनुमति पाएको हो । कम्पनीले आयोजना प्रभावित स्थानीय र सर्वसाधारणहरूका लागि आइपिओ निष्कासन गर्न लागेको हो ।

कम्पनीको उक्त साधारण शेयर सार्वजनिक गर्न निष्कासन तथा बिक्री प्रबन्धकको काम सिभिल क्यापिटल मार्केट लिमिटेडले गर्नेछ ।