कोलेनिका सोलुखुम्बुद्धारा ११ महिनामा १८ करोड बढि राजश्व संकलन

सोलुखुम्बु । कोष तथा लेखा नियन्त्रक कार्यालय सोलुखुम्बुले चालु आर्थिक वर्ष २०७८/०७९ मा १८ करोड ४७ लाख ९४ हजार दुई सय ३५ रुपैयाँ ३८ पैसा राजश्व संकलन गरेको छ । कार्यालयले संघ तर्फको कार्यालयबाट ११ महिना अर्थात साउन महिनादेखि जेष्ठ ३१ गतेसम्ममा सो राजश्व संकलन गरेको हो ।
यस्तै प्रदेश तर्फका कार्यालयहरुबाट ५१ लाख ९४ हजार चार सय १६ रुपैयाँ ३९ पैसा राजश्व संकलन गरेको कोष तथा लेखा नियन्त्रक कार्यालय सोलुखुम्बुका प्रमुख नवराज भट्टराईलाई उद्धृत गर्दै सह लेखापाल महेस भण्डारीले जानकारी दिनुभयो ।
प्रदेशतर्फको कार्यालय अन्र्तगत ११ महिनाको अवधिमा सबैभन्दा बढि राजश्व घरेलु तथा साना उद्योग विकास समितिले २४ लाख २० हजार नौँ सय रुपैयाँ संकलन गरेको छ । यस्तै कार्यालयको तथ्यांक अनुसार सबैभन्दा कम कृषि ज्ञान केन्द्रले २० हजार तीन सय रुपैयाँ संकलन गरेको छ ।
यता संघका कार्यालय अन्र्तगत सबैभन्दा बढि कोष तथा लेखा नियन्त्रक कार्यालय सोलुखुम्बुले आठ करोड ४६ लाख ४० हजार ६ सय ५३ रुपैयाँ ५२ पैसा संकलन गरेको छ । यस्तै सबैभन्दा कम जिल्ला निर्वाचन कार्यालय सोलुखुम्बुले १० हजार पाँच सय रुपैयाँ संकलन गरेको कार्यालयको तथ्यांक रहेको छ ।