खुम्बु: एकीकृत सेवाको पहिलो दिन १५३ जनाले लिए सेवा

काठमाडौँ ।   खुम्बु पासाङल्हामु गाउँपालिकाले काठमाडौँको चुच्चे पाटीमा एकीकृत सेवा सुरु गरेको आज पहिलो दिन १५३ जनाले सेवा लिएका छन् ।  आज साउन १८ गतेदेखि गाउँपालिकाले काठमाडौँमा सुरु गरेको एकीकृत सेवामा एक सय ५३ जनाले सेवा लिएको गाउँपालिकाले जनाएको छ ।

वडा नम्बर १ बाट सामाजिक सुरक्षा भत्ता नवीकरणका लागि १९ जनाले सेवा लिएको खुम्बु पासाङल्हामु गाउँपालिकाका प्रमुख प्रशासकीय अधिकृत नवराज गौतमले जानकारी दिनुभयो ।

उहाँका अनुसार वडा नम्बर २ बाट १० जना, वडा ३ बाट १६ जना, वडा ४ बाट सात जना र वडा ५ बाट १० जनाले सामाजिक सुरक्षा भत्ता नवीकरण सम्बन्धी सेवा लिएका छन् ।

यस्तै वडा १ बाट भूमि कर, नाबालिका परिचयपत्र सम्बन्धी १० जना, वडा २ बाट जन्म दर्ता, व्यवसाय दर्ता सम्बन्धी दुई जना, वडा ३ बाट तिरो, जन्म दर्ता, नागरिकता सिफारिस पाँच जना, वडा ४ बाट व्यवसाय दर्ता सम्बन्धी एक जना र वडा ५ बाट जन्म दर्ता सम्बन्धी तीन जनाले सेवा लिएको गाउँपालिकाले जनाएको छ ।

वडा १, २ र ३ बाट १३ जनाले राष्ट्रिय परिचय पत्र लिएका छन् ।

काठमाडौँमा अस्थायी रूपमा बसोबास गर्ने र स्थायी रूपमा पालिकाभित्र ठेगाना भएका सेवाग्राहीहरूलाई हुने सुविधालाई मध्यनजर गर्दै १८ साउनदेखि २१ साउनसम्म चार दिन एकीकृत सेवा सञ्चालन गर्ने गाउँपालिकाले जनाएको छ ।