सोलुखुम्बुमा भिड नियन्त्रण सम्बन्धी अभ्यास

सोलुखुम्बु । जिल्ला प्रहरी कार्यालय सोलुखुम्बुले भिड नियन्त्रण सम्बन्धी अभ्यास गराएको छ । प्रशिक्षणका क्रममा रहेका नगर प्रहरी लगायतका प्रहरी टोली मार्फत आज शुक्रवार जिल्ला समन्वय समितिको प्राङ्गणमा अभ्यास गराएको हो ।

भई परि आउने घटना र तनावग्रस्त परिस्थितिलाई सामना गर्न सुरक्षा बलले कसरी काम गर्नुपर्छ भन्ने विषयमा जानकारी दिने उद्देश्यले अभ्यास गराइएको जिल्ला प्रहरी कार्यालय सोलुखुम्बुका प्रहरी नायव उपरीक्षक द्वारिका प्रसाद घिमिरेले जानकारी दिनुभयो ।

प्रमुख जिल्ला अधिकारी अनोज कुमार घिमिरेले यस्ता अभ्यासले आफ्नो कार्यक्षेत्रमा कार्यसम्पादनमा मद्दत पुग्नका साथै सहजता प्रदान गर्ने बताउनुभयो ।

वहाँले मानवीय तथा भौतिक क्षति कम हुने किसिमले भिड नियन्त्रण गर्न मद्दत पुग्ने बताउँदै शान्ति सुरक्षा कायम गराउन थप टेवा पुग्ने विश्वास व्यक्त गर्नुभयो ।

तनावग्रस्त परिस्थितिलाई सामान्य अवस्थामा ल्याउन सुरक्षा बलको भूमिका महत्त्व हुने भएकाले आफू सुरक्षित हुन र नागरिकको सुरक्षा गर्न सो अभ्यासले सघाउ पुग्ने प्रजिअ घिमिरेको भनाइ छ ।