काठमाडौँ । कोभिड–१९ नियन्त्रणका लागि आफ्नै सरकारले जारी गरेका नियम उल्लंघन गरेकी नर्वेकी प्रधानमन्त्री एर्ना सोल्वेगले माफी माग्नुभएको छ । फेब्रुअरी २५ का दिन ६० औं जन्मदिन मनाउन परिवारसहित नर्वेको राजधानी ओस्लो बाहिरको होल नगरपालिका जानुभएको समयमा उक्त नगरपालिकाले बनाएको नियम उल्लंघन गरेको स्रोतले जनाएको छ ।
प्रधानमन्त्री सोल्वेग १४ जना पारिवारिक सदस्यसहित दुई दिनको लागि कोल नगरपालिकाको एक रेस्टुरेन्टमा पुग्नुभएको थियो । व्यक्तिगत गतिविधिको लागि १४ जना जम्मा हुनुले सरकारबाट जारी गरिएकै नियमको सरकार प्रमुखले नै उल्लंघन गरेको थाहा पाएर नर्वेको सरकारी सञ्चारमाध्यम एनआरकेले समाचार सार्वजनिक गरेको थियो ।
राम्रोसँग नियमको अध्ययन नगर्दा आफूबाट गल्ती हुन गएको उहाँको भनाइ छ । नर्वेका नागरिकले नियमको पूर्ण पालना गरेको र आफूबाट उल्लंघन भएको हुँदा नागरिक रिसाएको भन्दै उहाँले आफूबाट भएको गल्तीको नागरिकसरह नै कानूनी कारबाही भोग्न समेत तयार रहेको बताउनुभएको छ ।
समाचारमा आएको विषय र प्रधानमन्त्रीले गरेको स्वीकारोक्ति पछि प्रहरीले थप अध्ययन गर्न थालेको छ । प्रहरीले प्रेस विज्ञप्ति जारी गर्दै संचारमाध्यममा आएको सूचना र प्रधानमन्त्री आफैंले दिएको बयानका आधारमा संक्रमण नियन्त्रण सम्बन्धी नियमको उल्लंघन भएको देखिन्छ भनेर उल्लेख गरिएको छ ।
के कस्ता स्थानीय र केन्द्रीय नियम उल्लंघन भएका छन् भनेर स्पष्ट हुन प्रहरीले थप अध्ययन थालेको विज्ञप्तिमा उल्लेख रहेको एनआरकेले समाचार प्रकाशन गरेको छ । अनुसन्धानको लागि कति समय लाग्ने यकिन नभए पनि प्रहरीले चाँडो अनुसन्धान सक्ने प्रतिबद्धता जनाएको छ ।
अनुसन्धान पछि के कस्ता गतिविधि गरिएको थियो सोही अनुसार कारबाही हुने जनाइएको छ । सामान्यतः व्यक्तिगत गतिविधिको लागि भेटघाट गर्दा आयोजकले २० हजार र सहभागीले १० हजार क्रोनर जरिवाना लाग्ने नियम छ ।
नर्वेमा कोरोना संक्रमणको दर बढ्दै गएपछि दोस्रो पटक नोभेम्बरबाट निजी भेटघाट तथा गतिविधिमा १० जनाभन्दा बढी भेला हुन नपाउने नियम जारी गरेको छ । नियम उल्लंघन गरेपछि कतिपय नागरिकले प्रधानमन्त्रीको राजीनामा समेत माग गरेका छन् ।
