‘बिग बोस १४’का लागि सलमान खानले लिए २५० करोड

भारतीय टिभी रियालिटी सो ‘बिग बोस’को १३ औं संस्करण विवादित रह्यो। सँगै टेलिभिजन रेटिङ चार्टमा सबैभन्दा माथि समेत उक्लियो। कार्यक्रमको नयाँ सिजन सुरु हुन लागेको छ जसका लागि बलिउडका बिग बोस, सलमान खान नै प्रस्तोता रहन्छन्। कार्यक्रमको प्रोमोहरू छायाँकन भइसकेको छ।

कार्यक्रमका लागि हरेक एपिसोड बराबर १० करोड २५ लाख अर्थात् कुल २ सय करोड ५० लाख रुपैयाँ पारिश्रमिक लिँदैछन् सलमान। बलिउड हंगामाले जनाए अनुसार यो सर्वाधिक पारिश्रमिक हो। बिग बोस छायाँकनका लागि सलमानले ३ महिनाभर सातामा एक दिन दिनेछन्।

सेप्टेम्बरदेखि नै प्रसारण हुने भनउको कार्यक्रम छायाँकनमा ढिलाइ भएको छ। मुम्बईस्थित फिल्म सिटीमा बिगबोसको घर निर्माण मनसुनका कारण प्रभावित छ। अक्टोबरदेखि कार्यक्रम प्रसारण हुनेछ।

यस वर्ष कार्यक्रममा १६ सहभागी रहने छन्। तीमध्ये १३ जना सेलिब्रेटी हुन् भने ३ जना सर्वसाधारण। उनीहरु सबै एउटै घरमा बस्ने छन्।

सहभागीहरु बिग बोसको घरमा प्रवेश गर्नुअघि उनीहरुको कोरोना भाइरस परीक्षण गरिने छ। कोरोना भाइरस संक्रमण नियन्त्रण र रोकथामका लागि कार्यक्रमका केही नियम तथा निर्देशिका परिवर्तन गरिएको जनाइएको छ।