बर्ड फ्लुको सङ्क्रमण उस्तै छ, पशुपक्षी बिरामी परेमा पशुसेवा निकायमा खबर गरौँ: पशुसेवा विभाग

काठमाण्डौ । देशका विभिन्न ठाउँमा बर्ड फ्लुको सङ्क्रमण बढेपछि पशुसेवा विभागले पशुपक्षी बिरामी परेमा तत्काल नजिकको पशुसेवा निकायमा खबर गर्न आग्रह गरेको छ ।

पशुपक्षी फार्म अथवा अरु बिक्री वितरण स्थलमा पशुपक्षी अस्वाभाविक रुपमा बिरामी परेमा वा मर्न थालेमा तत्काल खबर गर्न विभागले आग्रह गरेको हो । विभागका प्रवक्ता चन्द्र ढकालले आफूहरुले नियमित अनुगमनको कामहरु गरिरहेको क्रममा केही ठाउँमा बर्ड फ्लुको सङ्क्रमण देखा परेको कारण खुला रुपमा गरिने पंक्षीपालनलाई निरुत्साहित गर्नुपर्ने उल्लेख गर्नुभयो ।

विभागका प्रवक्ता ढकालका अनुसार नमुना केन्द्रीय पशुपक्षी रोग अन्वेषण प्रयोगशाला, त्रिपुरेश्वरमा पीसीआर परीक्षण गर्दा बर्ड फ्लु पुष्टि भएको हो । नख्खु क्षेत्रमा ५१६ हाँस, ८५४ स्थानीय कुखुरा, १५४ बट्टाई, ९४४ वटा अण्डा, ३३५ केजी दाना नष्ट गरिएको विभागले जनाएको छ ।

यस्तै बर्ड फ्लु रोग पुष्टि भएको क्षेत्रबाट रोग अरु ठाउँमा फैलिन नदिन त्यहाँ रहेका पशुपक्षीलाई तत्काल नियन्त्रणमा लिनका लागि सङ्घ, प्रदेश र पालिकाबाट दक्षजनशक्ति परिचालन गरिएको र त्यस क्षेत्रलाई पूर्ण निःसङ्क्रमण गरिने गरिएको प्रवक्ता ढकालले जानकारी दिनुभयो ।