निगुरोको साग आम्दानिको बलियो श्रोत बन्दै

सोलुखुम्बु । सोलुखुम्बुका तरकारी व्यापारीहरु निगुरोको साग आम्दानिको बलियो श्रोत भएको बताउँछन । जंगलमा पाइने सागलाई बेचेर आफनो आम्दानिको स्रोत बनाइरहेको व्यापारीहरुको भनाइ छ ।
सोलुदुधकुण्ड नगरपालिका वडा नम्बर ७ गार्माकी रीता कला सुनुवारले हप्तामा करिव दुई हजार रुपैयाँ आम्दानि हुने बताउनुहुन्छ । आफुले भनेकै भाउमा ग्राहकले किन्ने गरेको कारण सामान्य फाइदा भएको उहाँ सुनाउनुहुन्छ ।
प्रति मूठा ५० रुपैयाँमा बेच्ने गरेको सुनुवार बताउनुहुन्छ । निगुरो बेचेर आएको पैसाले घरखर्चमा सहयोग पुग्ने रीता कला सुनुवारको भनाइ छ ।
यस्तै माप्य दुधकोशी गाउँपालिकाकी डोल्मा शेर्पाले हप्तामा २० देखि २५ मुठासम्म निगुरो बेच्ने गरेको बताउनुहुन्छ । निगुरो बेचेरै हप्तामा १५ सय रुपैयाँदेखि दुई हजार रुपैयाँसम्म आम्दानि हुने गरेको शेर्पाको भनाइ छ ।

निगुरो बेचेर आएको पैसाले छोराछोरीको लागि लत्ताकपडा देखि घरमा आवश्यक नुन तेल किन्ने गरेको उहाँ बताउनुहुन्छ ।
एक मुठा निगुरो टिप्न करीव ३ घण्टासम्म समय लाग्ने गरेको डोल्मा शेर्पा बताउनुहुन्छ ।
यता सोलुदुधुण्ड नगरपालिका ६ की अनिता राई निगुरोको साग मिठो हुने भएको कारण आफुले प्राय किन्ने गरेको सुनाउनुहुन्छ । आफुलाई मनपर्ने साथै पौष्टिकताले भरिपूर्ण भएकाले महँगो भएपनि निगुरोको साग आफनो रोजाइमा परेको उहाँको भनाइ छ ।
आफुले खेति गरेर दुख गर्नु नपर्ने भएको कारण पनि निगुरोको व्यापारले फाइदा नै भएको व्यापारीहरुको भनाइ छ । तर निगुरो खोज्नका लागि जंगल जानुपर्ने साथै जंगलमा बाघ, भालु, सर्प साथै अन्य वन्यजन्तुको डर हुने व्यापारीहरु बताउँछन ।