सोलुखुम्बु । सृजनशिल युवा क्लब सोताङले फागु पुर्णिमा (होलि) पर्वको अवसरमा खुला नयाँ वडा स्तरीय महिला तथा पुरुष भलिबल प्रतियोगिताको आयोजना गरेको छ । यहि चैत्र १३ देखि १६ गतेसम्म प्रतियोगिता सञ्चालन हुने क्लवले जनाएको छ ।
दक्ष खेलाडी उत्पादन गर्ने, खेलको माध्यमबाट गाँउको पहिचान गराउने साथै सँस्कृतिको जर्गेना गर्ने उद्देश्यका साथ आयोजना गरिएको भलिबल प्रतियोगीताका साथ विविध साँस्कृतिक कार्यक्रमकोे समेत आयोजना गरिएको क्लबका सदस्य तथा प्रचार प्रमुख मिलन नाछिरीङले बताउनुभयो । ‘भाषा, सँस्कार र भेषभुषा हाम्रो सान, समृद्ध समाज निर्माण युवाको अभियान’ भन्ने नाराका साथ आयोजना हुन लागेको प्रतियोगिता नयाँ निर्माणाधीन सोताङ गाउँपालिका भवनको प्राङ्गणमा चार दिनसम्म सञ्चालन हुने आयोजकले जनाएको छ ।
महिला तथा पुरुष भलिबल प्रतियोगिताका विजेता समूहले १५,००० रुपैँया नगदको साथमा ट्रफी, मेडल र प्रमाण–पत्र पाउने छन । यस्तै दोस्रो र तेस्रो र सान्त्वना हुने समूहलाई क्रमशः नगद दश हजार, पाँच हजार र तीन हजार रुपैँयाको साथमा ट्रफी, मेडल र प्रमाण–पत्र प्रदान गरिने छ ।
चैत्र ११ देखि १३ गते बिहान ८ बजेसम्म आफै उपस्थित भएर वा फोनबाट टिम दर्ता गर्न सकिने प्रचार प्रमुख मिलन नाछिरीङले जानकारी दिनुभयो । कार्यक्रम सफल बनाउन तयारीलाई तीब्र पारिएको उहाँको भनाई छ ।