खुम्बु पासाङल्हामु गाउँपालिका । खुम्बु पासाङल्हामु गाउँपालिका २ हिमालय क्लब लुक्लाको आयोजनामा सोलुखुम्बु जिल्ला स्तरीय ब्याडमिन्टन प्रतियोगिता सुरु भएको छ । हिमालय क्लब लुक्लाको २५ औँ वार्षिकोत्सवको अवसरमा आजदेखि जिल्ला स्तरीय ब्याडमिन्टन प्रतियोगिता सुरु भएको हो ।
नवनिर्मित कभर्ड हलको उद्घाटनसँगै सोलुखुम्बु जिल्ला स्तरीय ब्याडमिन्टन प्रतियोगिताको आयोजना गरिएको आयोजकले जनाएको छ । खेलको उद्घाटन कोशी प्रदेश सभा सदस्य एवं पूर्वमन्त्री बुद्धिकुमार राजभण्डारी र खुम्बु पासाङल्हामु गाउँपालिका अध्यक्ष मिङमा छिरी शेर्पाले गर्नुभएको थियो ।
प्रतियोगिताको पहिलो चरणमा जनप्रतिनिधि र कर्मचारीबिच मैत्रीपूर्ण खेल सञ्चालन गरिएको थियो । जनप्रतिनिधि टिममा गाउँपालिका अध्यक्ष मिङमा छिरी शेर्पा र वडा नम्बर २ का वडा अध्यक्ष आङ फूर्वा शेर्पा यस्तै कर्मचारी टिममा गाउँपालिकाका प्रमुख प्रशासकीय अधिकृत नवराज गौतम र प्रशासकीय अधिकृत सुजन बुढाथोकीबिच मैत्रीपूर्ण खेल भएको थियो । जसमा जनप्रतिनिधि र कर्मचारी दुवै टिमको खेल एक एक बराबरीमा सम्पन्न भएको थियो ।
असार ७ र ८ गते दुई दिन सञ्चालन हुने प्रतियोगितामा पुरुष सिङ्गलतर्फ १० टिम र पुरुष डबलतर्फ १५ टिम रहेको खेलका रेफ्री एवं जिल्ला व्याडमिन्न्टन सङ्घ सचिव अर्जुन श्रेष्ठले जानकारी दिनुभयो ।
प्रतियोगितामा पुरुष डबलतर्फ प्रथम, द्वितीय, तृतीय हुने विजयीलाई ५० हजार, ३० हजार र १५ हजार रुपैयाँको साथमा ट्रफि र मेडल र प्रमाणपत्रको व्यवस्था गरिएको आयोजकले जनाएको छ । यस्तै पुरुष सिङ्गलतर्फ प्रथम दितिय र तृतीय हुने प्रतियोगीलाई ३० हजार, १५ हजार र १० हजार रुपैयाँको पुरस्कारको व्यवस्था गरिएको छ ।
हाल अन्य प्रतियोगिताहरु सञ्चालन भइरहेको रेफ्री एवं जिल्ला व्याडमिन्न्टन सङ्घ सोलुखुम्बुका सचिव अर्जुन श्रेष्ठले जानकारी दिनुभयो ।
Discussion about this post