अतिरित्त हुलाकबाट अनिवार्य अवकाश भएका कर्मचारीहरू सम्मानित

सोलुखुम्बु । जिल्ला हुलाक कार्यालय सोलुखुम्बुले अतिरित्त हुलाकबाट अनिवार्य अवकाश भएका कर्मचारीहरूलाई सम्मान तथा बिदाइ गरेको छ । आज बिहीबार कार्यालयमा एक कार्यक्रमको आयोजना गरी जिल्ला हुलाक कार्यालय सोलुखुम्बु अन्तर्गतका विभिन्न अतिरित्त हुलाकहरूबाट अनिवार्य अवकाश भएका कर्मचारीहरूलाई सम्मान तथा बिदाइ गरेको हो ।

जिल्लामा अवस्थित विभिन्न २१ वटा अतिरीत्त हुलाकमा कार्यरत हुलाक प्रतिनिधि, डाक वाहक र पत्र वितरक गरी १२ जना कर्मचारीहरूलाई आज कदर पत्रद्वारा सम्मान तथा बिदाइ गरिएको जिल्ला हुलाक कार्यालय सोलुखुम्बुका निमित्त हुलाक अधिकृत उषा दाहालले जानकारी दिनुभयो ।

अतिरीत्त हुलाक नियमावली २०३४ को पाँचौँ संशोधनले अतिरित्त हुलाकमा कार्यरत कर्मचारी र ५८ वर्ष पूरा भएपछि स्वैच्छिक अवकाश पाउने नियमावली अनुसार सोलुखुम्बुमा ३५ जना अनिवार्य अवकाश र २ जना स्वैच्छिक अवकाश गरी ३७ जनालाई सम्मान तथा बिदाइ गरिने जिल्ला हुलाक कार्यालय सोलुखुम्बुले जनाएको छ ।

अनिवार्य अवकाश भएका सबै कर्मचारीहरूलाई उपचार खर्च र थप सुविधाहरू नेपाल सरकारले उपलब्ध गराएको जिल्ला हुलाक कार्यालय सोलुखुम्बुका सूचना अधिकारी विनोद निरौलाले जानकारी दिनुभयो ।

जुनवेशी अतिरित्त हुलाकका पत्र वितरक जाङबु लामाको सबैभन्दा बढी सेवा अवधि ४६ वर्ष र तामाखानी अतिरीत्त हुलाकका हुलाक प्रतिनिधि रिन्जी शेर्पाको सबैभन्दा कम सेवा अवधि १६ वर्ष रहेको जिल्ला हुलाक कार्यालय सोलुखुम्बुले जनाएको छ ।

अनिवार्य अवकाश प्राप्त कर्मचारीहरूलाई सम्मान गर्दै जिल्ला हुलाक कार्यालय सोलुखुम्बुका निमित्त हुलाक अधिकृत उषा दाहालले स्वस्थ र खुसी जीवनको कामना गर्दै आगामी समयमा हुलाक कार्यालय सधैँ साथमा रहने प्रतिबद्ध जनाउनुभयो ।

अनिवार्य अवकाश भएका कर्मचारीहरूले कार्यालयबाट बिदाइ हुँदै गर्दा हुलाक सेवा निकै प्रभावकारी साथै विश्वसनीय रहेको प्रतिक्रिया दिएका छन् । हाल प्रविधिले हुलाक सेवालाई खुम्च्याएको भए तापनि उत्तिकै चलायमान तथा विश्वसनीय रहेको बताएका छन् ।