काठमाण्डौ – आज प्रतिनिधि सभा बैठक बस्दै छ । दिउँसो १ बजेका लागि बोलाइएको बैठकमा दिवंगत सांसदको निधनमा शोक प्रस्ताव पारित गर्ने सम्भावित कार्यसूची रहेको छ ।
आजको बैठकमा विभिन्न संसदीय समितिका सभापतिले वार्षिक प्रतिवेदनहरू पेश गर्ने कार्यक्रम तय भएको छ ।
यस्तै प्रतिनिधि सभाको चालु हिउँदे अधिवेशन केही दिनमै अन्त्य हुने सम्भावना बढेको छ । बर्खे अधिवेशन अबको एक महिना भित्रै बोलाउनुपर्ने भएकोले चालु हिउँदे अधिवेशन अन्त्य गर्नुपर्ने अवस्था आएको सांसदहरुले बताएका छन् ।
नेकपा (एमाले) संसदीय दलका प्रमुख सचेतक विशाल भट्टराईका अनुसार बर्खे अधिवेशन वैशाख भित्रै बोलाउनुपर्ने संवैधानिक व्यवस्था भएकाले यो अधिवेशन अब धेरै लामो जान सक्ने सम्भावना छैन ।
अधिवेशनका लागि विधेयकको लामो सूची भए पनि चालु अधिवेशनमा कुनै विधेयक पेश नभएको र महत्वपूर्ण विषयमा घनिभूत छलफल हुन नसकेको संसदीय सुनुवाई समितिका सभापति लक्ष्मणलाल कर्णले उल्लेख गर्नुभयो।
