काठमाडौँ । मिस टिन २०१९ को विजेता प्रतिभा ‘रानी’ राईले म्यूजिक भिडियोमा डेब्यू गरेकी छिन् ।
केशव गिरीको निर्माणमा भरतबहादुर भण्डारी ‘सोझो गाउँले’ले लेख्नुभएको सुदुर पश्चिमेली गीत ‘बालो जोवन’ को म्यूजिक भिडियोमा उनले अभिनय गरेकी छिन् ।
उनको साथमा प्रिन्सेस अफ दी यूनिभर्स २०१७ की विजेता रक्षा थापा, जीवन जंग थापा र राजु गिरीले अभिनय गरेका छन् ।
अनु चौधरी र विष्णु भट्टको आवाज रहेको गीतमा बालापनदेखिकोे मायालाई प्रगाढ बनाउँदै मायामा सफल भएको कुरा सो गीतको कथा मार्फत प्रस्तुत गरिएको गीतकार सोझो गाउँलेको भनाइ छ ।
याम गुरुङको निर्देशनमा भिडियोलाई महेस महराले खिचेका छन् ।
सुदुर पश्चिमेली लवजमा तयार गरिएको गीत ‘बालो जोवन’ म्यूजिक भिडियोको छायांकन कार्य सकिएको साथै दर्शकसामु ल्याउने तयारीमा रहेको निर्माता केशव गिरीले बताएका छन् ।
शिक्षा क्षेत्रमा लामो सयमदेखि कार्यरत केशव गिरी गीत संगीतको क्षेत्रमा समेत चासो भएको कारण आफुले पहिलो पटक म्यूजिक भिडियो निर्माण गरेको बताएका छन् ।
साथै गीतको शब्द र अभिनय मनछुने किसीमको भएको कारण लाखौँ श्रोता तथा दर्शकहरुले मन पराउने आशा राखेका छन् ।
यस्तै कलाकार नयाँ भए पनि अभिनयले लाखौँ श्रोताको मन जित्न सक्ने भन्दै लगानी सुरक्षित रहने पनि गिरीले विश्वास समेत लिएका छन् ।
यस म्यूजिक भिडियोबाट डेब्यू गरेकी प्रतिभा रानी राईले आफूले राम्रो अभिनय गर्ने प्रयास गरेको बताएकी छिन् । पहिलो म्यूजिक भिडियो भएको कारण आफू उत्साहित हुनुको साथै दर्शक श्रोताको कस्तो प्रतिक्रिया आउँछ भनेर पर्खाइमा रहेको बताउँछिन ।
साथै यस अघि विभिन्न गीत तथा नाटकमा समेत अभिनय गरिसकेकी रक्षा थापाले हरेक प्रोजेक्टमा काम गर्दा नयाँ अनुभव लिएको साथै नयाँ कुरा सिक्न सकिने बताइन ।
निर्माता केशव गिरीका अनुसार ‘बालो जोवन’ प्रतिभा रानी राईको डेब्यू भिडियो हो भने रक्षा थापाको चौथो म्यूजिक भिडियो हो । साथै राजु गिरीले समेत यसै गीतबाट डेब्यू गरेका हुन् ।